Read Papantla Totonac Kantikanan di Salomon 1 Bible Online

Kantikanan di Salomon 1 - Papantla Totonac bible

Kantikanan di Salomon 1

¹Salomon su Kantika di Kantikanan.

²"O, ku e sunchi mi ku e sunchinan di su boka! Pasobra bo amor ta miho ku bina.

³Bo zetanan tin un holo dushi, manera zeta purifika bo nomber ta; pesei e birgennan ta stimabo.

⁴Hibami ku bo i laga nos kore huntu! Rei a hibami den su kambernan." "Nos lo ta kontentu i regosiha den bo; nos lo alaba bo amor mas ku bina." "Ku rason nan ta stimabo.

⁵"Mi ta pretu, ma bunita, O yu muhenan di Jerusalem, manera e tentnan di Kedar, manera e kortinanan di Salomon.

⁶No keda wak mi pasobra mi ta pretu, pasobra solo a kimami. E yu hombernan di mi mama tabata rabia ku mi; nan a hasimi kuidado di e kunukunan di wendruif, ma mi no a kuida mi mes kunuku di wendruif

⁷Bisami, abo, kende mi alma ta stima, unda bo ta pastoria bo tou, unda bo ta laga bo tou drumi merdia? Pasobra pakiko mi mester ta manera un muhe ku ta tapa su mes ku velo banda di e tounan di bo kompaneronan?"

⁸"Si bo no sa, abo, esun di mas bunita entre muhenan, sigui lastro di e tou, i pastoria bo kabritunan chikitu banda di e tentnan di e wardadonan di karne."

⁹"Mi amor, pa mi bo ta manera mi yewa entre e garoshinan di Farao.

¹⁰Bo band'i kara ta bunita ku adornonan, bo garganta tur na koyar di kuenta."

¹¹"Nos lo traha adornonan di oro pa bo, ku kuenta di plata."

¹²"Mientras ku rei tabata na su mesa, mi perfume tabata manda su holo dushi.

¹³Mi stima ta un saku di mirra pa mi, ku ta keda henter anochi entre mi pechunan.

¹⁴Mi stima ta un boshi di flor di hena pa mi den e kunukunan di wendruif di En-gadi."

¹⁵"Ki bunita bo ta, mi amor, ki bunita bo ta! Bo wowonan ta manera palomba."

¹⁶"Ki nechi bo ta, mi stima, i asina plasentero! Di berdat, nos kama ta luhoso!

¹⁷E balkinan di nos kas ta di palu di seda, nos spannan, di palu di sipres.