Read Papantla Totonac Kantikanan di Salomon 2 Bible Online

Kantikanan di Salomon 2 - Papantla Totonac bible

Kantikanan di Salomon 2

¹"Ami ta e rosa di Saron, e leli di e vayenan."

²"Manera un leli meimei di sumpina, asina mi amor ta meimei di e mucha muhenan."

³"Manera un palu di apel meimei di e palunan di mondi-sera, asina mi stima ta meimei di e yonkumannan. Mi a gosa grandemente di sinta den su sombra, i su fruta tabata dushi na mi shel'i boka.

⁴El a hibami na su sala di bankete, i su bandera ofer di mi ta amor.

⁵Sostenemi ku klompi di rasenchi, refreskami ku apel, pasobra mi ta malu di amor.

⁶Laga su man robes ta bou di mi kabes i su man drechi brasami."

⁷"Mi ta hura boso, O yu muhenan di Jerusalem, pa e gaselnan of pa e binanan di sabana, pa boso no lanta ni spierta mi amor te ora ku e ta desea esaki."

⁸"Tende! Mi stima! At'e ta bin, subiendo e serunan, bulando riba e seritunan!

⁹Mi stima ta manera un gasel of un yu di bina. Mira, e ta para tras di nos muraya, e ta wak dor di e bentananan; e ta lur dor di e tralinan.

¹⁰Mi stima a kontesta i a bisami: 'Lanta, mi amor, mi bunita, i ban ku mi.

¹¹Pasobra, mira, wenter a pasa, awaseru a pasa i a disparse.

¹²E flornan a sali kaba den e tera; a yega e tempu pa snui mata di wendruif, i e bos di tortelduif a wordu tend! den nos tera.

¹³E palu di figo a hasi su figonan hecha, i e matanan di wendruif na flor ta manda nan holo dushi. Lanta, mi amor, mi bunita, i ban ku mi!'"

¹⁴"O mi palomba, den e skernan di baranka, na e luga sekreto di e subida di baranka, lagami mira bo kara; lagami tende bo bos; pasobra bo bos ta dushi, i bo kara ta bunita."

¹⁵"Kohe e zoronan pa nos, e zoronan chikitu ku ta ruina e kunukunan di wendruif, mientras ku nos kunukunan di wendruif ta na flor."

¹⁶"Mi stima ta di mi, i mi ta di dje; e ta pastoria su tou meimei di e lelinan.

¹⁷Te na e ora fresku di dia ora ku e sombranan ta hui bai, bolbe, mi stima, i sea manera un gasel of un yu di bina riba e serunan di Beter.