Read Papantla Totonac Kantikanan di Salomon 3 Bible Online

Kantikanan di Salomon 3 - Papantla Totonac bible

Kantikanan di Salomon 3

¹"Riba mi kama, nochi tras nochi, mi a buska esun ku mi alma ta stima; mi a busk'e, ma mi no a han'e.

²'Mi mester lanta awor i bai ront den stat; den e kayanan i riba e plenchinan mi mester buska esun ku mi alma ta stima.' Mi a busk'e, mi no a han'e.

³E guardianan ku ta hasi rondu den stat a hanami, i mi a bisa: 'Boso a mira esun ku mi alma ta stima?'

⁴Apenas mi a pasa nan bai ku mi a hana esun ku mi alma ta stima; mi a ten'e i no kier a lagu'e bai, te ora mi a tres'e na kas di mi mama, i den kamber di esun ku a konsebimi."

⁵"Mi ta hura boso, O yu muhenan di Jerusalem, pa e gaselnan of pa e binanan di sabana, pa boso no lanta ni spierta mi amor, te ora ku e desea esaki."

⁶"Ta kiko esaki ta ku ta subi bin for di desierto manera kolumnanan di huma, perfuma ku mirra i sensia, ku tur sorto di polvo aromatiko di komersiante?

⁷Mira, ta e stul ku nan ta karga Salomon riba dje; tin sesenta homber poderoso ront di dje, di e hombernan poderoso di Israel.

⁸Nan tur ta karga spada, i ta eksperto den guera; kada homber tin su spada na su hep, pa motibu di terornan di anochi.

⁹Rei Salomon a traha pa su mes un karosa di palu di Libano.

¹⁰El a traha su speilunan di plata, su lomba di oro i su asiento di tela purpura, su parti paden fura ku amor dor di e yu muhenan di Jerusalem.

¹¹Sali, O yu muhenan di Sion, i keda wak rei Salomon ku e korona ku su mama a koron'e kune riba e dia di su kasamentu, i riba e dia di alegria di su kurason."