Read Papantla Totonac Kantikanan di Salomon 5 Bible Online

Kantikanan di Salomon 5 - Papantla Totonac bible

Kantikanan di Salomon 5

¹"Mi a bin den mi hofi, mi ruman, mi bruit; mi a piki mi mirra huntu ku mi balsem. Mi a kome mi panal di miel i mi miel; mi a bebe mi bina i mi lechi. Kome, amigunan; bebe, si, bebe kuantu ku boso kier, O namoradonan."

²"Mi tabata na sono, ma mi kurason a keda lanta. Un bos! Mi stima tabata bati na porta. 'Habri pa mi, mi ruman, mi amor, mi palomba, esun perfekto di mi! Pasobra mi kabes ta yen di serena, mi loknan ta yen di damp di anochi.'

³Mi a kita mi bisti; kon mi por bistie atrobe? Mi a laba mi pianan; kon mi por susha nan atrobe?

⁴Mi stima a pasa su man dor di e habri, i mi kurason a kuminsa bati duru p'e.

⁵Mi a lanta pa habri pa mi stima; i mi mannan tabata gotia mirra, i mi dedenan tabata gotia mirra likido riba mannan di e grendel.

⁶Mi a habri pa mi stima, ma mi stima a bira bai kaba! Mi kurason a desmaya, ora ku el a papia. Mi a busk'e, ma mi no a han'e; mi a yam'e, ma e no a kontestami.

⁷E guardianan ku tabata hasi rondu den stat a hanami; nan a dal mi i a heridami; e guardianan di e murayanan a kita mi shal for di mi.

⁸Mi ta hura boso, O yu muhenan di Jerusalem, si boso hana mi stima, kiko boso tin di bis'e: pasobra mi ta malu di amor."

⁹"Ki sorto di stima bo stima ta, O, esun di mas bunita entre muhenan? Ki sorto di stima bo stima ta, ku bo ta hura nos asina?"

¹⁰"Mi stima ta kolo kla i kora, sobresaliente entre dies mil.

¹¹Su kabes ta manera oro, oro puru; su loknan ta manera troshinan di dadel, i pretu manera raf.

¹²Su wowonan ta manera palomba, kantu di koridanan di awa, bana den lechi, poni den nan montura.

¹³Su bandanan di kara ta manera un kama di balsem, hofinan di yerba di holo dushi; su lepnan ta lelinan ku ta gotia mirra likido.

¹⁴Su mannan ta baranan di oro ku berilo poni riba nan; su barika ta ivor graba, kubri ku safiro.

¹⁵Su pianan ta pilarnan di alabaster poni riba base di oro puru; su aparensia ta manera Libano, ekselente manera palu di seda.

¹⁶Su boka ta yen di dulsura, i e ta kompletamente deseabel. Esaki ta mi stima i esaki ta mi amigu, O yu muhenan di Jerusalem."