Read Papantla Totonac Kantikanan di Salomon 8 Bible Online

Kantikanan di Salomon 8 - Papantla Totonac bible

Kantikanan di Salomon 8

¹"O, si bo tabata manera un ruman homber pa mi, ku a bebe na e pechunan di mi mama. Si mi a hanabo pafo, lo mi a sunchi bo; i ni un hende lo no a despresiami.

²Lo mi a guiabo i hibabo den kas di mi mama, kende a instruimi; lo mi a dunabo bina ku speserei bebe for di e djus di mi granatapelnan.

³Laga su man robes ta bou di mi kabes, i su man drechi brasami."

⁴"Mi kier pa boso hura, O yu muhenan di Jerusalem, no lanta ni spierta mi amor, te ora ku e ta desea esaki."

⁵"Ta ken esaki ta ku ta subi bin for di desierto, mientras ku e ta len riba su stima?" "Bou di e palu di apel mi a lantabo for di sono; ayanan bo mama tabatin dolo pa bo, ayanan e tabatin dolo i a duna lus na bo.

⁶Ponemi manera un seyo riba bo kurason, manera un seyo riba bo brasa. Pasobra amor ta mes fuerte ku morto, yalursheit ta mes severo ku Seol; su flamnan ta flamnan di kandela, e flam di SENOR.

⁷Hopi awanan no por paga amor, ni riunan lo no pasa ofer di dje; si un hende duna tur e rikesanan di su kas pa amor, tog esaki lo wordu despresia kompletamente."

⁸"Nos tin un ruman muhe chikitu, i e no tin pechu; kiko nos lo hasi pa nos ruman muhe riba e dia ku un hende pidi p'e?

⁹Si e ta un muraya, nos lo traha un defensa di plata riba dje; ma si e ta un porta, nos lo ser'e aden ku tablanan di seda."

¹⁰"Mi tabata un muraya, i mi pechunan tabata manera toren; e ora ei mi a bira den su bista manera un hende ku ta hana pas.

¹¹Salomon tabatin un kunuku di wendruif na Baal-hamon; el a konfia e kunuku di wendruif na kuidadonan; kada un mester a trese mil siklo di plata pa su fruta.

¹²Mi mes kunuku di wendruif ta na mi disposishon; e mil siklonan ta pa bo, Salomon, i dos shen ta pa esnan ku ta kuida su fruta."

¹³"O abo ku ta sinta den e hofinan, mi kompaneronan ta skucha pa tende bo bos; lagami tend'e!"

¹⁴"Pura, mi stima, i sea manera un gasel of un bina yon riba e serunan di speserei."