Read Papantla Totonac Isaiah 1 Bible Online

Isaiah 1 - Papantla Totonac bible

Isaiah 1

¹E vishon ku Isaias, yu homber di Amos, a mira tokante di Juda i Jerusalem, durante di e dianan di Uzias, Jotam, Akaz i Ezekias, reinan di Juda.

²Skucha, O shelunan, i tende, O tera; pasobra SENOR ta papia: "Mi a kria i a kuida yunan, ma nan a rebeldia kontra Mi.

³Buey konose su dono, i buriku konose pesebre di su shon, ma Israel no sa, Mi pueblo no ta komprende."

⁴O nashon pekaminoso, pueblo karga ku inikidat, desendientenan di malbadonan, yunan ku ta komporta nan mes na un manera korupto! Nan a bandona SENOR, nan a despresia Esun Santu di Israel, nan a bira lomba p'E.

⁵Pakiko mester sigui batibo? Pakiko bo ta sigui rebeldia? Henter e kabes ta malu, i henter e kurason ta desmaya.

⁶For di plant'i pia te na kabes no tin nada bon den dje, sino solamente herida, golpi i yaga habri ku no a wordu primi, ni mara ku verbant, ni suavisa ku zeta.

⁷Boso tera ta desola, boso statnan ta kima ku kandela; i boso kunukunan, stranheronan ta destrui nan den boso presensia; e ta un desolashon, komo si fuera ta stranheronan a destruie.

⁸I e yu muhe di Sion a keda manera un kabana den un kunuku di wendruif, manera un chosa den un kunuku di konkomber, manera un stat rondona.

⁹Si e SENOR di ehersitonan no a laga algun sobrebibiente pa nos, nos lo tabata manera Sodoma, nos lo tabata manera Gomora.

¹⁰Tende e palabra di SENOR, boso, gobernantenan di Sodoma; skucha e instrukshon di nos Dios, boso, pueblo di Gomora.

¹¹"Di kiko e multitut di boso sakrifisionan ta sirbiMi?" SENOR ta puntra. "Mi ta harta di boso ofrendanan kima di chubatu i di e vet di bestianan gorda. Mi no ta hiba gustu den e sanger di bishe machu, lamchi of kabritu.

¹²Ora boso bin pa presenta Mi dilanti, ta ken ta eksigi di boso pa trapa Mi pationan?

¹³No trese ofrendanan bano mas, sensia ta un abominashon pa Mi. Luna nobo i sabat, e yamamentu di asambleanan-- Mi no por soporta inikidat, ni e asamblea solem.

¹⁴Mi ta odia boso festivalnan di luna nobo i boso fiestanan stipula; nan a bira un karga pa Mi. Mi ta kansa di soporta nan.

¹⁵Pesei, ora boso habri boso mannan den orashon, lo Mi skonde Mi wowonan pa boso; si, maske boso hasi hopi orashon, lo Mi no skucha. Boso mannan ta yen di sanger.

¹⁶Laba boso mes, hasi boso mes limpi; kita e maldat di boso echonan for di Mi bista. Stop di hasi maldat,

¹⁷sina di hasi bon, buska huisio, reprende e hende kruel, defende e werfano, pleita kaso di e biuda.

¹⁸"Bin awor, i laga nos rasona huntu," SENOR ta bisa. "Maske boso pikanan ta manera skarlata, nan lo bira blanku manera sneu; maske nan ta kora manera skarlata, nan lo bira manera lana.

¹⁹Si boso ta dispuesto i ta obedese, boso lo kome e miho di e tera;

²⁰ma si boso nenga i rebeldia, spada lo devora boso." Di berdat, e boka di SENOR a papia.

²¹Mira kon e stat fiel a para bira un prostituta, esun ku tabata yen di rektitut! Un tempu hustisia tabata biba den dje, ma awor ta asesinonan ta biba den dje.

²²Bo plata a bira skuma, bo bibida ta meskla ku awa.

²³Bo gobernantenan ta rebeldenan i kompaneronan di ladron; nan tur ta stima plaka pasa bou di mesa i ta kore tras di rekompensa. Nan no ta defende e werfano, i kaso di e biuda tampoko no ta yega serka nan.

²⁴Pesei e Senor DIOS di ehersitonan, Esun Poderoso di Israel, ta deklara: "Mira, lo Mi libra Mi mes di Mi atversarionan, i tuma vengansa riba Mi enemigunan.

²⁵Tambe lo Mi bira Mi man kontra bo, i lo Mi dirti bo skuma, komo si fuera ta ku soda brabu Mi ta hasie, i lo Mi kita tur bo impuresa.

²⁶E ora ei lo Mi restora bo huesnan manera den tempunan aya, i bo konseheronan manera den prinsipio; despues lo bo wordu yama stat di hustisia, un stat fiel."

²⁷Sion lo wordu redimi ku huisio, i esnan di dje ku repenti, ku hustisia.

²⁸Ma transgresornan i pekadonan, tur dos, lo wordu destrui, i esnan ku bandona SENOR lo yega na un fin.

²⁹Siguramente boso lo tin berguensa di e palunan di eik ku boso a desea, i boso lo keda brongosa pa motibu di e hofinan ku boso a skohe.

³⁰Pasobra boso lo ta manera un palu di eik ku su blachinan ta marchita, of manera un hofi sin awa.

³¹E homber fuerte lo bira manera yerba seku, su trabou manera un chispa di kandela; asina nan tur dos lo kima huntu, sin ningun hende pa paga nan.