Read Papantla Totonac Isaiah 11 Bible Online

Isaiah 11 - Papantla Totonac bible

Isaiah 11

¹Anto un Spreit lo sali for di e tronkon di Isai, i un Rama for di su raisnan lo karga fruta.

²E Spiritu di SENOR lo keda riba djé, e Spiritu di sabiduria i komprendementu, e Spiritu di konseho i poder, e Spiritu di konosementu i temor di SENOR.

³I E lo tin delisia den e temor di SENOR, i E lo no huzga segun loke Su wowo ta mira, ni hasi desishon segun loke Su orea ta tende;

⁴ma ku hustisia E lo huzga e pobernan, i disidi ku onestidat pa e afliginan di e tera; i E lo suta e tera ku e bara di Su boka, i ku e rosea di Su lepnan E lo mata e malbado.

⁵Hustisia lo ta e faha ront di Su hep, i fieldat e faha ront di Su sintura.

⁶Lobo lo ta huntu ku lamchi di karne, leopardo lo kai drumi banda di lamchi di kabritu, i bishe, leon chikitu i bestia gorda lo ta huntu, i un mucha chikitu lo guia nan.

⁷Baka i ber lo kome yerba huntu; nan chikitunan lo drumi banda di otro, i leon lo kome yerba seku manera buey.

⁸Yu na pechu lo hunga banda di buraku di kolebra, i yu kita for di pechu lo hinka su man den kueba di vibora.

⁹Nan lo no kousa dano ni destrukshon den henter Mi seru santu, pasobra tera lo ta yen di e konosementu di SENOR, manera awa ta tapa laman.

¹⁰Anto lo sosode den e dia ei ku e nashonnan lo akudi na e Rais di Isai, Kende lo para komo un senal pa e nashonnan; i Su luga di sosega lo ta glorioso.

¹¹I den e dia ei lo sosode ku Senor lo ekstende Su man pa di dos bes, pa rekohe e restante di Su pueblo--ku lo keda--for di Asiria, Egipto, Patros, Etiopia, Elam, Sinar, Hamat, i for di e islanan di laman.

¹²I E lo lanta un emblema pa e nashonnan, i lo trese huntu esnan di Israel ku a wordu deporta, i lo reuni esnan di Juda ku a wordu plama, trese nan for di e kuater skinanan di tera.

¹³E ora ei e envidia di Efrain lo disparse, i esnan ku ta tormenta Juda lo wordu korta kita afo. Efrain lo no envidia Juda, i Juda lo no tormenta Efrain.

¹⁴Nan lo baha riba skouder di e filisteonan den direkshon pabou; huntu nan lo plunder e yu hombernan di direkshon pariba. Nan lo podera di Edom i Moab, i e yu hombernan di Amon lo wordu someti na nan.

¹⁵SENOR lo destrui e lenga di Laman di Egipto kompletamente; i E lo zwai Su man riba Riu Eufrates, ku Su bientu kayente. I E lo dal e partie den shete korida di awa, i hasi hende pasa dor di dje ku sandalia na pia.

¹⁶I lo tin un kaminda grandi for di Asiria pa e restante di Su pueblo ku lo keda, meskos ku tabatin pa Israel den e dia ku nan a sali for di tera di Egipto.