Read Papantla Totonac Isaiah 13 Bible Online

Isaiah 13 - Papantla Totonac bible

Isaiah 13

¹Un profesia tokante di Babilonia, ku Isaias, yu homber di Amos, a mira.

²Lanta un emblema riba e seru pelon, halsa boso bos yama nan. Hasi sena ku boso man pa nan drenta e portanan di e nobelnan.

³Mi a duna ordu na esnan konsagra na Mi, i Mi a yama Mi guereronan poderoso, Mi hendenan ku ta regosiha ku orguyo, pa ehekuta Mi rabia.

⁴Un zonidu di tumulto riba e serunan, manera e tumulto di hopi hende! Un zonidu di e tumulto di reinonan, di nashonnan ku a reuni huntu! E SENOR di ehersitonan ta mobilisa e ehersito pa bataya.

⁵Nan ta bin for di un tera leu, for di fin di e shelunan, SENOR i Su instrumentnan di indignashon, pa destrui henter e tera.

⁶Lamenta, pasobra e dia di SENOR ta serka! E lo bin manera destrukshon for di e Todopoderoso.

⁷Pesei tur man lo bira slap, i kurason di tur hende lo dirti.

⁸Nan lo yena ku teror, dolo i ansha lo podera di nan; nan lo trose manera un muhe na ora di parto; tur turdi nan lo wak otro, ku kara manera flam di kandela.

⁹Mira, e dia di SENOR ta bin, kruel, ku furia i ku rabia ardiente, pa hasi e tera un desolashon; i E lo kaba ku e pekadonan ku tin den dje.

¹⁰Pasobra e streanan di shelu i nan konstelashonnan lo no duna nan klaridat; solo lo ta skur ora e sali, i luna lo no duna su klaridat.

¹¹Asina lo Mi kastiga mundu pa su maldat, i e malbadonan pa nan inikidat. Tambe lo Mi pone un fin na e arogansia di e orguyosonan, i rebaha e orguyo di hende kruel.

¹²Lo Mi hasi hende mortal mas skars ku oro puru, i humanidat mas skars ku oro di Ofir.

¹³Pesei lo Mi hasi e shelunan tembla, i tera lo wordu sakudi for di su luga den e furia di e SENOR di ehersitonan, den e dia di Su rabia ardiente.

¹⁴I lo sosode ku manera un gasel ku yagdo ta persigui, of manera karne sin wardado, kada un lo bolbe serka su mes hendenan, i kada un lo hui bai su mes tera.

¹⁵Ken ku nan hana lo wordu traspasa, i ken ku nan kaptura lo kai pa medio di spada.

¹⁶Nan muchanan chikitu tambe lo wordu plecha dilanti di nan bista; nan kasnan lo wordu geplunder i nan esposanan viola.

¹⁷Mira, Mi ta bai lanta e medonan kontra nan, kendenan no ta interesa den plata ni tin plaser den oro.

¹⁸Nan bognan lo plecha e hobennan; nan lo no tene kompashon ku e fruta di barika, ni nan wowo lo no tene duele di mucha.

¹⁹I Babilonia, e bunitesa di reinonan, e gloria di e orguyo di e kaldeonan, lo ta manera Sodoma i Gomora, tempu ku Dios a destrui nan.

²⁰Di generashon pa generashon nunka mas e lo wordu habita ni pobla; ni arabir lo no arma su tent ayanan, ni wardado di karne lo no pone su tou di karne drumi ayanan.

²¹Ma bestianan di desierto lo sosega ayanan, i nan kasnan lo ta yen di palabrua; abestrus tambe lo biba ayanan, i kabritu di mondi lo bula ront ayanan.

²²I hiena lo yora den nan torennan fortifika i chakal den nan palasionan luhoso. Tambe su tempu lo bin pronto i su dianan lo no wordu prolonga.