Read Papantla Totonac Isaiah 15 Bible Online

Isaiah 15 - Papantla Totonac bible

Isaiah 15

¹Un profesia tokante di Moab. Siguramente den un anochi Ar di Moab a keda destrui i ruina; siguramente den un anochi Kir di Moab a keda destrui i ruina.

²Nan a subi bai na e tempel i na Dibon, na e luganan haltu, pa yora. Moab ta lamenta ofer di Nebo i Medeba; tur hende su kabes ta pelon i tur barba ta kita.

³Den nan kayanan nan a faha nan mes ku pana di saku; riba dak di nan kasnan i riba nan plenchinan tur hende ta lamenta i ta yora sin fin.

⁴Hesbon i Eleale tambe ta sklama; nan bos ta wordu tendi te na Jahaza; pesei e hombernan arma di Moab ta grita yora; su alma ta tembla den dje.

⁵Mi kurason ta sklama pa Moab; su fugitivonan a yega te na Zoar i Eglat-selisia; nan ta subi e subida di Luhit na yoramentu; siguramente riba kaminda di Horonaim nan ta lansa gritu di angustia ofer di nan ruina.

⁶Pasobra e awanan di Nimrim a keda desola. Siguramente e yerba a seka, yerba ku a kaba di nase a muri; no a keda nada ku ta berde.

⁷Pesei e abundansia ku nan a atkiri i a warda, nan ta hiba ofer di e roi di Arabim.

⁸Pasobra e gritu di angustia a pasa tur ront den e teritorio di Moab; su sklamashon ta yega te na Eglaim i su lamentashon te na Beer-elim.

⁹Pasobra e awanan di Dimon ta yen di sanger; siguramente lo Mi trese mas kalamidat riba Dimon, un leon riba e fugitivonan di Moab i riba e restante di e tera.