Read Papantla Totonac Isaiah 17 Bible Online

Isaiah 17 - Papantla Totonac bible

Isaiah 17

¹Un profesia tokante di Damasko. "Mira, pronto Damasko lo no ta un stat mas, i e lo bira un monton di ruina.

²E statnan di Aroer ta bandona; nan lo sirbi pa tou di karne drumi aden, sin ningun hende pa spanta nan.

³E stat fortifika lo disparse for di Efrain, i soberania lo disparse for di Damasko i e restante di Siria; nan lo ta manera e gloria di e yunan di Israel," e SENOR di ehersitonan ta deklara.

⁴Awor lo sosode den e dia ei ku e gloria di Jakob lo mengua, i e vet di su kurpa lo para seka.

⁵E lo ta manera e kosechado ku ta rekohe mainshi para den kunuku, ora su brasa ta kita e tapushinan; of lo ta manera un hende ku ta piki tapushi di mainshi ku a resta den e vaye di Refaim.

⁶Ainda lo tin algun di dje ku a resta, manera ora ta sakudi palu di oleifi dos of tres oleifi ta keda na e taki di mas ariba, kuater of sinku na e ramanan di un palu fruktifero, SENOR, e Dios di Israel, ta deklara.

⁷Den e dia ei hende lo pone su bista riba Esun ku a trah'e, i su wowo lo mira na Esun Santu di Israel.

⁸E lo no pone su bista riba e altarnan, e obra di su mannan; tampoko e lo no mira riba loke su dedenan a traha, e imagennan di Asera i e altarnan di sensia.

⁹Den e dia ei nan statnan fortifika lo ta manera luganan bandona den mondi-sera, of manera rama ku nan a bandona pa motibu di e yunan di Israel; i e tera lo ta un desolashon.

¹⁰Pasobra bo a lubida e Dios di bo salbashon i no a korda riba e baranka di bo refugio, pesei bo ta planta mata bunita i ta planta nan ku stek di mata di un dios strano.

¹¹E dia ku bo plant'e, bo ta traha un trankera ront di dje ku masha kuidou, i mainta bo ta laga bo simia saka konopi; ma e kosecha lo ta un monton di ruina den un dia di malesa i dolo inkurabel.

¹²Ai di e babel di un multitut di hende, ku ta zona manera ronkamentu di laman, i e boroto di nashonnan, ku ta borota manera boroto di awanan poderoso!

¹³E nashonnan ta borota manera boroto di hopi awanan, ma E lo reprende nan i nan lo hui bai leu, i lo wordu persigui manera bagas den e serunan ta wordu persigui dor di bientu, of manera stof ku ta keda drai dilanti di warwaru.

¹⁴Mira, atardi tin teror! Prome ku mainta nan no t'ei mas. Esaki ta e porshon di esnan ku ta plunder nos, i destino di esnan ku ta horta nos.