Read Papantla Totonac Isaiah 2 Bible Online

Isaiah 2 - Papantla Totonac bible

Isaiah 2

¹E palabra ku Isaias, yu homber di Amos, a mira tokante di Juda i Jerusalem.

²Awor lo sosode den e ultimo dianan ku e seru di e kas di SENOR lo wordu stables! komo e seru prinsipal, i lo wordu halsa mas haltu ku e seritunan; i tur nashon lo basha bai na dje.

³I hopi pueblo lo bin bisa: "Ban, laga nos subi bai na e seru di SENOR, na e kas di e Dios di Jakob, pa E sina nos tokante di Su kamindanan, i pa nos kana den Su berehanan." Pasobra e lei lo sali for di Sion, i e palabra di SENOR for di Jerusalem.

⁴I E lo huzga entre e nashonnan, i lo reprende hopi pueblo. I nan lo bati nan spadanan traha plug ku nan, i nan lo bati nan lansanan traha sker-pa-snui ku nan. Nashon lo no lanta spada kontra nashon, i nunka mas nan lo tren pa guera.

⁵Bin, kas di Jakob, laga nos kana den e lus di SENOR.

⁶Bo a bandona Bo pueblo, e kas di Jakob, pasobra nan ta yen di influensia for di oriente, i nan ta mirado di destino meskos ku e filisteonan, i nan ta sera kombenio ku yu di stranhero.

⁷Tambe nan tera ta yen di plata i oro, i no tin fin na nan tesoronan; tambe nan tera ta yen di kabai, i no tin fin na nan garoshinan.

⁸Tambe nan tera ta yen di idolo; nan ta adora e obra di nan mannan, loke nan dedenan a traha.

⁹Asina e hende umilde a wordu umiya, i e hende importante a wordu rebaha; ma no pordona nan.

¹⁰Drenta den baranka i skonde bou di tera pa e teror di SENOR i pa e splendor di Su mahestat.

¹¹E mirada orguyoso di hende lo wordu rebaha, i e arogansia di hende lo wordu umiya, i SENOR so lo wordu halsa den e dia ei.

¹²Pasobra e SENOR di ehersitonan tin un dia kontra tur hende orguyoso i arogante, i kontra tur hende halsa, pa nan wordu rebaha,

¹³i kontra tur palu di seda di Libano, arogante i halsa, kontra tur palu di eik di Basan,

¹⁴kontra tur seru arogante, kontra tur seritu halsa,

¹⁵kontra tur toren haltu, kontra tur muraya fortifika,

¹⁶kontra tur barku di Tarsis i kontra tur bunita obra di man.

¹⁷E orguyo di hende lo wordu umiya, i e arogansia di hende lo wordu rebaha; i SENOR so lo wordu halsa den e dia ei.

¹⁸Ma e idolonan lo disparse kompletamente.

¹⁹Hende lo drenta den kuebanan den baranka i den burakunan den tera, pa motibu di e teror di SENOR i pa motibu di e splendor di Su mahestat, ora ku E lanta pa hasi tera tembla.

²⁰Den e dia ei hende lo tira nan idolonan di plata i nan idolonan di oro, ku nan a traha pa nan adora, pa mol i raton di anochi,

²¹pa bai den e skernan den baranka i den e holnan den baranka haltu, pa motibu di e teror di SENOR i pa motibu di e splendor di Su mahestat, ora ku E lanta pa hasi tera tembla.

²²Stop di konfia den hende, kende su rosea ta den su nanishi, pasobra ki balor e tin?