Read Papantla Totonac Isaiah 21 Bible Online

Isaiah 21 - Papantla Totonac bible

Isaiah 21

¹Un profesia tokante di e desierto na laman. Manera bientu fuerte di Negev ta suta ketu bai, asina e ta bin for di desierto, for di un tera teribel.

²Un vishon spantoso a wordu mustra na mi: e traido ta sigui trata ku traishon, i e destruido ta destrui ketu bai. Subi, Elam, rondona, Media! Mi a pone un fin na tur e kehamentu ku el a kousa.

³Pa e motibu aki mi paden ta yen di angustia; dolo a serami, manera dolo di un muhe na ora di parto. Mi ta asina angustia ku mi no por tende, asina yen di teror, ku mi no por mira.

⁴Mi kurason ta bula; horor ta podera di mi; e freskura di atardi ku mi tabata anhela na dje, a bira temblamentu pa mi.

⁵Nan ta pone mesa, nan ta habri pana di mesa, nan ta kome, nan ta bebe: "Lanta, boso prensnan, hunta e eskudonan ku zeta!"

⁶Pasobra, asina Senor ta bisami: "Bai! Pone un homber vigila. Lagu'e reporta loke e ta mira.

⁷Ora ku e mira un trupa di koredo, koredo di kabai na dos-dos, un trupa di buriku, un trupa di kamel, lagu'e paga bon atenshon, hopi bon atenshon."

⁸E ora ei e homber ku ta vigila a grita manera leon: "O Senor, di dia mi ta para kontinuamente riba e toren di vigilansia, i tur anochi mi ta para na mi post.

⁹Awor mira, un trupa di koredo ta bin, koredo di kabai na dos-dos." Anto un di nan a kontesta i a bisa: "Babilonia a kai, ta kai mes el a kai; i tur e imagennan di su diosnan a keda tur garna tira abou na suela."

¹⁰Ai mi pueblo bati, i mi afliginan di e plenchi-di-bati-mainshi! Loke mi a tende di e SENOR di ehersitonan, e Dios di Israel, mi ta konta boso.

¹¹Un profesia tokante di Edom. Un hende ta keda yamami for di Seir: "Guardia, kuantu ora mas a keda di anochi? Guardia, kuantu ora mas a keda di anochi?"

¹²E guardia ta kontesta: "Mainta ta bin, ma anochi tambe. Si bo kier informa, anto informa; bin bek atrobe."

¹³Un profesia tokante di Arabia. Boso mester pasa nochi den e mondinan-sera di Arabia, O karavananan di Dedan.

¹⁴Trese awa pa esnan ku tin set, O habitantenan di tera di Tema; sali bai kontra ku e fugitivonan ku pan.

¹⁵Pasobra nan a hui pa spada, pa spada saka for di balina i pa bog gespan, i pa e preshon di bataya.

¹⁶Pasobra t'asina Senor a bisami: "Aki un ana, manera un trahado kontrata lo a konta esaki, tur splendor di Kedar lo termina,

¹⁷i esnan ku resta di e kantidat di tiradonan-di-flecha, e hombernan poderoso di e yunan di Kedar, lo ta poko, pasobra e SENOR Dios di Israel a papia."