Read Papantla Totonac Isaiah 22 Bible Online

Isaiah 22 - Papantla Totonac bible

Isaiah 22

¹Un profesia tokante di e vaye di vishon. Kiko a pasa boso awor, ku boso tur a subi bai riba dak di kas?

²Abo ku tabata yen di boroto, abo, stat di buya, abo, stat di alegria; bo mortonan no a wordu mata ku spada, ni nan no a muri den bataya.

³Tur bo gobernantenan a hui bai huntu; nan a wordu kaptura sin ku mester a uza bog; tur ku a wordu hana den bo a wordu kaptura huntu, maske nan a hui bai masha leu.

⁴Pesei mi ta bisa: "Kita bo bista for di mi, lagami yora amargamente; no purba di konsolami tokante di e destrukshon di e yu muhe di mi pueblo."

⁵Pasobra e Senor DIOS di ehersitonan tin un dia di paniko, angustia i konfushon den e vaye di vishon, un bashamentu abou di murayanan i un gritamentu na e seru.

⁶Anto Elam a kohe su muchila-pa-karga-flecha, huntu ku garoshi, soldanan-na-pia i koredonan di kabai; i Kir a saka eskudo.

⁷Bo vayenan di mas bunita tabata yen di garoshi, i e koredonan di kabai a pone nan mes den ordu di bataya na e porta di stat.

⁸I El a kita e defensa di Juda. Den e dia ei bo tabata depende riba e armanan di e kas di mondi-sera,

⁹i boso a mira ku e kibranan den muraya di e stat di David tabata hopi; i boso a rekohe awa for di e tanki mas abou.

¹⁰E ora ei boso a konta e kasnan di Jerusalem, i boso a tumba kasnan pa fortifika e muraya.

¹¹I meimei di e dos murayanan boso a traha un rembak, pa e awa di e tanki bieu. Ma boso no a depende di Esun ku a trah'e, ni boso no a tuma den konsiderashon Esun ku a plania esaki hopi tempu pasa.

¹²Pesei den e dia ei e Senor DIOS di ehersitonan a yama boso pa yora, pa lamenta, pa feita kabes i pa bisti pana-di-saku.

¹³Ma na luga di esei tin goso i alegria, matamentu di baka i matamentu di karne, komementu di karni i bebementu di bina: "Laga nos kome i bebe, pasobra manan nos ta muri."

¹⁴Ma e SENOR di ehersitonan a revela Su mes na mi: "Siguramente, te dia ku boso muri boso lo no ta pordona pa e inikidat aki," e Senor DIOS di ehersitonan ta bisa.

¹⁵Asina e Senor DIOS di ehersitonan ta bisa: "Bai serka e mayordomo aki, serka Sebna, kende tin enkargo di e kas di rei:

¹⁶'Ta ki derecho bo tin akinan, i ta ken bo tin akinan, ku bo a traha un tumba pa bo mes akinan, abo ku a traha un tumba na haltu, abo ku a kap un luga di sosega pa bo mes den baranka?

¹⁷'Mira, SENOR ta bai bentabo afo ku violensia, O homber; E ta kla pa garabo duru,

¹⁸i lorabo firme manera un bala, pa wordu tira den un pais inmenso; ayanan lo bo muri, i ayanan bo garoshinan luhoso lo keda, abo, berguensa pa kas di bo maestro.'

¹⁹Lo Mi bahabo for di bo luga, i lo Mi rankabo bahabo for di bo puesto.

²⁰"Anto lo sosode den e dia ei ku lo Mi yama Mi sirbido Eliakim, yu homber di Hilkias,

²¹i lo Mi bistie bo tunika i mara bo faha bon mara na su barika. Lo Mi entrega bo outoridat na dje, i e lo bira un tata pa e habitantenan di Jerusalem i pa e kas di Juda.

²²E ora ei lo Mi pone e yabi di kas di David riba su skouder. Ora ku e habri, ningun hende lo no sera; ora ku e sera, ningun hende lo no habri.

²³Lo Mi klab'e manera un klabu den un luga firme, i e lo bira un trono di gloria pa e kas di su tata.

²⁴Asina nan lo kologa tur e gloria di e kas di su tata na dje, yunan i nietunan, tur artikulo-di-uzo di mas chikitu, for di komchi te na tur sorto di butishi.

²⁵"Den e dia ei," e SENOR di ehersitonan ta deklara, "e klabu klaba den un luga firme lo los; e lo kibra kit'afo i kai, i e karga ku ta kologa na dje lo wordu kit'afo, pasobra SENOR a papia."