Read Papantla Totonac Isaiah 23 Bible Online

Isaiah 23 - Papantla Totonac bible

Isaiah 23

¹Un profesia tokante di Tiro. Lamenta, O barkunan di Tarsis, pasobra Tiro a wordu destrui i a keda sin kas i sin haf; for di tera di Sipres nan a risibi e notisia aki.

²Keda ketu, boso, habitantenan di tera na kosta, boso, komersiantenan di Sidon; boso mensaheronan a krusa laman.

³Pasando riba hopi awanan e mainshi di Sihor-- e kosecha di Neil--tabata e ganashi di Tiro, i e tabata e merkado di nashonnan.

⁴Tene berguensa, O Sidon, pasobra laman ta papia, e luga fortifika di laman ta bisa: "Mi no tabatin dolo di parto, ni mi no a duna lus; mi no a lanta yu homber, ni mi no a kria birgen."

⁵Ora ku e notisia yega Egipto, nan lo ta den ansha pa motibu di e notisia di Tiro.

⁶Krusa bai Tarsis; lamenta, O habitantenan di tera na kosta.

⁷Ta esaki ta boso stat alegre, kual su origen ta di tempunan antiguo, kual su pianan tabata hib'e pa kolonisa luganan leu?

⁸Ta ken a plania esaki kontra Tiro, esun ku ta regala korona, esun ku su komersiantenan tabata prensnan, esun ku su negoshantenan tabata e onorabelnan di tera?

⁹E SENOR di ehersitonan a plania esaki pa rebaha e orguyo di tur bunitesa, pa menospresia tur e onorabelnan di tera.

¹⁰Inunda bo tera manera Neil ta hasi, O yu muhe di Tarsis; no tin nada mas pa want'e.

¹¹El a ekstende Su man ofer di laman, El a hasi reinonan tembla. SENOR a duna un ordu tokante di Kanaan pa destrui su luganan fortifika.

¹²I El a bisa: "Lo bo no regosiha mas, O birgen desonra, yu muhe di Sidon. "Lanta, krusa bai Kitim; ayanan tampoko lo bo no hana sosiegu."

¹³Ata, e tera di e kaldeonan-- esaki ta e pueblo ku no ta eksisti mas. Asiria a destin'e pa ta un luga pa bestia di desierto. Nan a lanta nan torennan di baluarte, nan a plunder su palasionan, nan a hasie un ruina.

¹⁴Lamenta, O barkunan di Tarsis, pasobra boso luga fortifika ta destrui.

¹⁵Awor lo sosode den e dia ei ku Tiro lo wordu lubida pa setenta ana, e dianan di un rei. Na fin di setenta ana lo sosode ku Tiro manera e kantika di prostituta ta bisa:

¹⁶"Kohe bo arpa, bai ront den e stat, O prostituta ku hende a lubida. Pika e kuerdenan bunita asina, kanta hopi kantika, pa bo wordu rekorda."

¹⁷I lo sosode na fin di setenta ana ku SENOR lo bishita Tiro. E ora ei e lo bai bek na su pago di prostitushon i lo komete fornikashon ku tur reino riba superfisio di tera.

¹⁸I su ganashi i su pago di prostitushon lo wordu konsagra na SENOR. Esaki lo no wordu warda ni montona, ma su ganashi lo bira sufisiente kuminda i bistinan di mas miho pa esnan ku ta biba den e presensia di SENOR.