Read Papantla Totonac Isaiah 25 Bible Online

Isaiah 25 - Papantla Totonac bible

Isaiah 25

¹O SENOR, Bo ta mi Dios; lo mi halsaBo; lo mi duna gradisimentu na Bo nomber; pasobra Bo a hasi kosnan maraviyoso, plannan forma hopi tempu pasa, den fieldat perfekto.

²Pasobra Bo a hasi e stat bira un monton, e stat fortifika, un ruina; e sitadel di stranheronan no ta stat mas; nunka mas e lo wordu lanta di nobo.

³Pesei un pueblo fuerte lo glorifikaBo; statnan di nashonnan kruel lo respetaBo.

⁴Pasobra Bo tabata un fortalesa pa esun sin yudansa, un fortalesa pa e hende pober den su angustia, un refugio kontra tempestat, un sombra kontra kalor; pasobra rosea di hende kruel ta manera tempestat kontra un muraya.

⁵Manera kalor den sekura Bo ta somete e boroto di stranheronan; manera kalor dor di sombra di un nubia, asina e kantika di hende kruel ta wordu silensia.

⁶I e SENOR di ehersitonan lo prepara un bankete luhoso pa tur pueblo riba e seru aki, un bankete di bina bieu, e miho pida-pidanan di karni i tuti i bina bieu refina.

⁷I riba e seru aki E lo destrui e velo ku ta tapa tur pueblo, si, e mantel ku ta habri ofer di tur nashon.

⁸E lo traga morto pa semper, i Senor DIOS lo seka awa di wowo for di tur kara. E lo kita e reproche di Su pueblo for di henter tera, pasobra SENOR a papia.

⁹Anto den e dia ei hende lo bisa: "Mira, esaki ta nos Dios, riba Kende nos a spera pa E salba nos. Esaki ta e SENOR, riba Kende nos a spera; laga nos regosiha i sea kontentu den Su salbashon."

¹⁰Pasobra e man di SENOR lo sosega riba e seru aki, i Moab lo wordu trapa na su mes sitio, manera yerba seku ta wordu trapa den e awa di un monton di mest.

¹¹I e lo habri su mannan meimei di dje, manera un landado ta habri su mannan pa landa; ma Senor lo rebaha su orguyo huntu ku e trikinan di su mannan.

¹²I e fortifikashonnan impenetrabel di bo murayanan E lo bash'abou, umiya, tira na suela, te den stof.