Read Papantla Totonac Isaiah 26 Bible Online

Isaiah 26 - Papantla Totonac bible

Isaiah 26

¹Den e dia ei e kantika aki lo wordu kanta na tera di Juda: "Nos tin un stat fuerte; Dios ta lanta murayanan i baluartenan pa siguridat.

²Habri e portanan di stat pa e nashon hustu drenta, esun ku ta keda fiel.

³Lo Bo warda den pas perfekto esun ku su pensamentu ta permanese den Bo, pasobra e ta konfia den Bo.

⁴Konfia den SENOR pa semper, pasobra den DIOS e SENOR nos tin un Baranka eterno.

⁵Pasobra El a rebaha esnan ku ta biba na haltu, e stat impenetrabel; E ta umiy'e, E ta umiy'e te na suela, E ta tir'e den stof.

⁶Pia lo trap'e, e pianan di esnan afligi, e pasonan di esnan sin yudansa."

⁷Kaminda di e hustu ta rekto; O Esun Rekto, hasi kaminda di e hustu pareu.

⁸Di berdat, mientras ku nos tabata sigui e kaminda di Bo huisionan, O SENOR, nos a spera riba Bo; Bo nomber, e rekuerdo di Bo, ta e deseo di nos alma.

⁹Anochi mi alma ta anhela na Bo, di berdat, mi spiritu den mi ta buskaBo ku diligensia; pasobra ora Bo huisionan bin riba tera, e habitantenan di mundu ta sina hustisia.

¹⁰Maske miserikordia wordu mustra na e malbado, e no ta sina hustisia; e ta trata inhustu den e tera di rektitut, i no kier mira e mahestat di SENOR.

¹¹O SENOR, Bo man ta halsa, ma nan no ta mira esaki. Nan ta mira Bo zelo pa e pueblo i nan ta wordu brongosa; di berdat, kandela lo kaba ku Bo enemigunan.

¹²SENOR, lo Bo stablese pas pa nos, pasobra Bo a hasi tur nos obranan pa nos.

¹³O SENOR nos Dios, otro senornan fuera di Bo a manda riba nos, ma pa medio di Bo so nos ta konfesa Bo nomber.

¹⁴Nan ta morto awor, nan no ta biba mas, nan a muri, nan no ta lanta mas; pesei Bo a kastiga i a destrui nan, i Bo a kita tur rekuerdo di nan.

¹⁵Bo a hasi e nashon oumenta, O SENOR, Bo a hasi e nashon oumenta, Bo ta wordu glorifika; Bo a ekstende tur e fronteranan di e tera.

¹⁶O SENOR, nan a buskaBo den angustia; apenas nan por a fluister un orashon; Bo kastigu tabata riba nan.

¹⁷Manera ora di duna lus ta yega pa un muhe na estado, i e ta trose i ta grita den su dolo di parto, asina nos tabata dilanti di Bo, O SENOR.

¹⁸Nos tabata na estado, nos tabata trose den dolo di parto, ma tabata komo si fuera ta bientu nos a pari. Nos no por a trese liberashon pa e tera, ni habitantenan di mundu no a nase.

¹⁹Bo mortonan lo biba; nan kadavernan lo lanta. Boso ku ta drumi den stof, spierta i grita di goso, pasobra bo serena ta manera serena di ourora, i tera lo duna lus na su mortonan.

²⁰Bin, mi pueblo, drenta den bo kambernan i sera bo portanan bo tras; skonde pa un poko tempu, te ora indignashon pasa.

²¹Pasobra mira, SENOR ta serka di sali for di Su luga di biba, pa kastiga e habitantenan di tera pa nan inikidat; i tera lo revela e sanger ku el a drama, i lo no tapa su mortonan mas.