Read Papantla Totonac Isaiah 29 Bible Online

Isaiah 29 - Papantla Totonac bible

Isaiah 29

¹Ai di Ariel, Ariel, e stat kaminda David a kampa! Anadi un ana na otro; warda boso fiestanan segun nan kurso.

²Tog lo Mi trese angustia pa Ariel, i e lo ta un stat di lamentashon i yoramentu; e lo ta manera un Ariel pa mi.

³Lo Mi kampa tur ront kontra bo i lo Mi lanta baluarte kontra bo, i lo Mi lanta torennan di bataya kontra bo.

⁴E ora ei lo bo wordu rebaha; for di suela lo bo papia, i bo palabranan lo sali for di den stof. Bo bos lo sali for di tera, manera bos di fantasma, i bo palabra lo sali ketu-ketu asina for di den stof.

⁵Ma e multitut di bo enemigunan lo bira manera stof fini, i e multitut di hende kruel manera bagas ku ta bula bai. I esaki lo sosode den un instante, direpiente.

⁶Dor di e SENOR di ehersitonan lo bo wordu kastiga ku strena, temblor i zonidu duru, ku warwaru, tempestat i flam di kandela ku ta destrui.

⁷I e multitut di tur e nashonnan ku ta bringa kontra Ariel, si, tur ku ta bringa kontra dje i kontra su luga fortifika, i ku ta pon'e den perta, lo ta manera un sono, un vishon den anochi.

⁸I lo ta manera ora ku un hende ku hamber ta sona ku e ta kome, ma ora ku e spierta, su stoma ta bashi; of manera ora ku un hende ku set ta sona ku e ta bebe, ma ora ku e spierta, at'el a keda morcha i su set no a kita. Asina e multitut di tur e nashonnan lo ta, ku ta bringa kontra Seru Sion.

⁹Spera i keda spera. Hasi boso mes siegu i keda siegu. Nan ta bira burachi, ma no di bina; nan ta tambalia, ma no di bibida sterki.

¹⁰Pasobra SENOR a basha un spiritu di sono profundo riba boso: El a sera boso wowonan, e profetanan; i El a tapa boso kabesnan, e miradonan.

¹¹I henter e vishon lo ta pa boso manera e palabranan di un buki seya. Ora nan entrega esaki na esun ku sa lesa, bisando: "Pa fabor, lesa esaki," e lo kontesta: "Mi no por, pasobra e ta seya."

¹²Of ora nan duna e buki na esun ku no sa lesa, bisando: "Pa fabor, lesa esaki", e lo bisa: "Mi no sa lesa."

¹³I Senor a bisa: "Pasobra e hendenan aki ta aserkaMi ku nan boka i ta onraMi ku nan lepnan, ma nan kurason ta leu for di Mi, i nan temor pa Mi ta konsisti di mandamentu di hende, ku nan ta sina for di kabes,

¹⁴pesei, mira, un biaha mas lo Mi hasi kosnan maraviyoso meimei di e pueblo aki, kosnan maraviyoso i milagroso; i e sabiduria di nan hombernan sabi lo perese, i e komprendementu di nan hombernan prudente lo ta skondi.

¹⁵Ai di esnan ku ta skonde nan plan bon skondi pa SENOR, i ku ta hasi nan obranan den un luga skur, i nan ta bisa: Ken ta mira nos?" of "Ken konose nos?"

¹⁶Boso ta bira kos robes pa drechi! E alfarero mester wordu konsidera igual ku e klei, ku loke a wordu traha lo a bisa esun ku a trah'e: "E no a trahami"? Of loke a wordu forma bisa esun ku a form'e: "E no tin komprendementu"?

¹⁷No ta djis den poko tempu Libano lo bira un kunuku fertil, i e kunuku fertil wordu konsidera komo mondi-sera?

¹⁸Den e dia ei e sordo lo tende palabranan di un buki, i for di nan tiniebla i skuridat wowonan di e siegu lo mira.

¹⁹Esnan afligi tambe lo oumenta nan alegria den SENOR, i esnan di mas pober di humanidat lo regosiha den Esun Santu di Israel.

²⁰Pasobra e hende kruel lo yega na un fin, i e hasido di bofon lo no eksisti mas; di berdat, tur ku tin intenshon di hasi maldat lo wordu korta kita afo--

²¹esnan ku ta trese un persona bou di kondenashon ku un palabra, i ku ta kohe den trampa esun ku ta huzga na e porta di stat, i ku ta defrouda esun ku ta den su derecho ku pleitamentu bano.

²²Pesei, asina SENOR, Kende a redimi Abraham, ta bisa tokante di e kas di Jakob: "Jakob lo no keda brongosa mas, tampoko su kara lo no bira blek mas,

²³ma ora ku e mira su yunan, e obra di Mi mannan, meimei di dje, eseinan lo santifika Mi nomber; di berdat, nan lo santifika Esun Santu di Jakob, i lo tin temor di e Dios di Israel.

²⁴I esnan ku ta desvia den spiritu lo konose e berdat, i esnan ku ta murmura lo asepta instrukshon.