Read Papantla Totonac Isaiah 3 Bible Online

Isaiah 3 - Papantla Totonac bible

Isaiah 3

¹Pasobra, mira, e Senor DIOS di ehersitonan ta bai kita for di Jerusalem i for di Juda tantu provishon komo manteneshon, e provishon kompleto di pan, i e provishon kompleto di awa,

²e homber poderoso i e guerero, e hues i e profeta, e adivinado i e ansiano,

³e kapitan di sinkuenta i e homber onorabel, e konsehero, e trahado eksperto di obra di man i e enkantado eksperto.

⁴Lo Mi hasi mucha bira nan prens, i mucha kaprichoso lo goberna riba nan.

⁵E pueblo lo wordu oprimi, kada un dor di e otro, i kada un dor di su bisina; hoben lo lanta kontra ansiano i esun inferior kontra esun onorabel.

⁶Ora ku un hende kohe su ruman homber tene den kas di su tata, i bisa: "Bo tin un mantel, abo lo ta nos gobernante, i e ruinanan aki lo ta na bo enkargo,"

⁷e ora ei esaki lo protesta, bisando: "Mi no kier ta boso sanador, pasobra den mi kas no tin pan ni mantel; no nombrami komo gobernante di e pueblo."

⁸Pasobra Jerusalem a trompeka i Juda a kai, komo ku nan palabranan i nan echonan ta kontra SENOR, pa rebeldia kontra Su presensia glorioso.

⁹E ekspreshon riba nan kara ta testigua kontra nan. Nan ta proklama nan pika manera Sodoma; nan no ta skond'e. Ai di nan, pasobra nan a trese maldat riba nan mes.

¹⁰Bisa e hustunan ku kos lo bai bon pa nan, pasobra nan lo kome e fruta di nan echonan.

¹¹Ai di e malbado! Kos lo bai malu p'e, pasobra nan lo hasi kune loke e merese.

¹²O Mi pueblo! Nan opresornan ta mucha, i muhe ta manda riba nan. O Mi pueblo! Esnan ku ta guiabo ta hasibo desvia, i ta konfundi e direkshon di bo kamindanan.

¹³SENOR ta lanta pa pleita Su kaso, i ta para pa huzga e pueblo.

¹⁴SENOR ta drenta huisio ku e ansianonan i prensnan di Su pueblo: "Ta boso a destrui e kunuku di wendruif; e botin di e hende pober ta den boso kasnan.

¹⁵Ki falta boso, ku boso ta plecha Mi pueblo, i ta mula kara di e hende pober?" e Senor DIOS di ehersitonan ta deklara.

¹⁶Ademas, SENOR a bisa: "Pasobra e yu muhenan di Sion ta orguyoso, i ta kana ku kabes na laira i ku wowo ku ta sedusi, i ta kana yanga, i ta laga e banchinan na nan pia zona,

¹⁷pesei Senor lo afligi kueru di kabes di e yu muhenan di Sion ku sarna, i SENOR lo ekspone nan berguensa."

¹⁸Den e dia ei Senor lo kita e bunitesa di nan banchinan di enkel, nan banchinan pa bisti na frenta, luneta,

¹⁹renchi largu di orea, armbant, velo,

²⁰pana di mara kabes, kadena di enkel, faha, boter di perfume, kos di suerte,

²¹renchi di dede, renchi di nanishi,

²²bisti di fiesta, tunika, mantel, kartera,

²³spil di man, pana djabou, tulban i velo.

²⁴Anto lo sosode ku na luga di perfume dushi lo tin putrimentu; na luga di faha, kabuya; na luga di peinado di moda, kabes pelon; na luga di pana fini, pana di saku; na luga di bunitesa, marka di heru kayente.

²⁵Bo hombernan lo kai pa medio di spada, i bo hombernan poderoso lo kai den bataya.

²⁶Su portanan lo lamenta i keha, i siendo bandona e lo sinta abou na suela.