Read Papantla Totonac Isaiah 32 Bible Online

Isaiah 32 - Papantla Totonac bible

Isaiah 32

¹Mira, un rei lo reina ku hustisia, i prensnan lo goberna ku huisio.

²Kada un lo ta manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.

³E ora ei wowo di esnan ku ta mira lo no wordu siega mas, i orea di esnan ku ta tende lo skucha.

⁴Kurason di e hende impulsivo lo diserni berdat, i lenga di e gagunan lo papia bon kla.

⁵E bobo lo no wordu yama nobel mas, tampoko e bandido lo no wordu yama generoso.

⁶Pasobra un bobo ta papia ko'i loko, i su kurason ta inklina na maldat, pa komete impiedat i pa plama eror tokante di SENOR, pa no satisfase e hende ku tin hamber, i pa nenga di duna awa pa bebe na esun ku tin set.

⁷Armanan di e bandido ta maligno; e ta inventa plannan maligno pa destrui e afliginan ku kalumnia, maske esun den nesesidat ta papia loke ta korekto.

⁸Ma e hende nobel ta inventa plannan nobel, i ta para pa loke ta nobel.

⁹Lanta, boso, muhenan ku ta sinti boso mes trankil, i skucha mi bos; paga tino na mi palabra, boso, yu muhenan ku ta sinti boso mes sigur.

¹⁰Denter di un ana i algun dia boso lo bira intrankil, O yu muhenan ku ta sinti boso mes sigur; pasobra e kosecha di wendruif a frakasa, i lo no tin kosecha di fruta.

¹¹Tembla, boso, muhenan ku ta sinti boso mes trankil; sea intrankil, boso, yu muhenan ku ta sinti boso mes sigur; kita sunu i bisti pana di saku na boso sintura.

¹²Bati riba boso pechu ku duele pa e kunukunan plasentero, pa e matanan di wendruif fruktifero,

¹³pa e tera di mi pueblo kaminda mata di sumpina i kadushi lo nase; si, pa tur e kasnan alegre i pa e stat di alegria.

¹⁴Pasobra e palasio a wordu bandona, e stat pobla, desola. Seritu i toren di vigilansia a bira kueba pa semper, un delisia pa buriku shimaron, yerba berde pa tounan di karne,

¹⁵te ora ku e Spiritu wordu basha riba nos for di ariba, i desierto bira kunuku fertil, i kunuku fertil wordu konsidera komo mondi-sera.

¹⁶E ora ei huisio lo biba den desierto, i hustisia lo biba den kunuku fertil.

¹⁷E fruta di hustisia lo ta pas, i e resultado di hustisia lo ta kietut i konfiansa pa semper.

¹⁸E ora ei mi pueblo lo biba den un luga kaminda pas ta reina, i den kasnan sigur i den luganan kaminda tin sosiegu i trankilidat,

¹⁹maske hagel kai i tumba tur palu di mondi-sera, i e stat keda kompletamente destrui.

²⁰Ki bendishona boso lo ta, boso ku ta sembra kantu di tur awa, i ku ta laga buey i buriku sali kana ront liber.