Read Papantla Totonac Isaiah 35 Bible Online

Isaiah 35 - Papantla Totonac bible

Isaiah 35

¹Tera seku i desierto lo ta kontentu, i Araba lo regosiha i floria manera rosa.

²E lo floria abundantemente, i regosiha ku goso i gritu di alegria. E gloria di Libano lo wordu duna na dje, e mahestat di Karmelo i Saron. Nan lo mira e gloria di SENOR, e mahestat di nos Dios.

³Enkurasha esnan agota, i fortalese esnan debil.

⁴Bisa esnan ku nan kurason ta yen di ansha: "Tene kurashi, no tene miedu. Mira, boso Dios lo bin ku vengansa, ku e pago di Dios, ma E lo salba boso."

⁵E ora ei wowo di e siegunan lo mira, i orea di e sordonan lo tende.

⁶Anto e kohonan lo bula manera bina, i lenga di e mudo lo grita di alegria. Pasobra awa lo basha den desierto, i koridanan di awa den Araba.

⁷Tera seku, kima dor di solo, lo bira plas di awa, i e tera ku tin set lo bira fuentenan di awa; den e luga pa chakal biba aden, esta, su luga di sosega, yerba ta bira richi i kabana.

⁸I lo tin un kaminda grandi ayanan, un karetera, i esaki lo wordu yama e Kaminda Grandi di Santidat. Hende impuru lo no pasa riba dje, ma e lo ta pa esun ku ta kana den e kaminda ei, i hende bobo lo no kana pariba pabou riba dje.

⁹Lo no tin ningun leon ayanan, ni ningun bestia feros lo no subi e kaminda ei; esakinan lo no wordu hana ayanan. Ma esnan redimi lo kana ayanan,

¹⁰i esnan redimi di SENOR lo bolbe; nan lo bin Sion ku gritu di goso, ku goso eterno riba nan kabes. Nan lo hana alegria i goso, i tristesa i suspiro lo hui bai.