Read Papantla Totonac Isaiah 36 Bible Online

Isaiah 36 - Papantla Totonac bible

Isaiah 36

¹Awor a sosode ku den e di dieskuater ana di rei Ezekias, Senakerib, rei di Asiria, a bin kontra tur e statnan fortifika di Juda i a kaptura nan.

²I rei di Asiria a manda Rabsakes for di Lakis pa bai Jerusalem serka rei Ezekias ku un ehersito grandi. El a bai para banda di e akuadukto di e tanki ariba, ku ta keda na e kaminda grandi di e Felt di Labado.

³Anto Eliakim, yu homber di Hilkias, kende tabata mayordomo di e kas, Sebna, e eskriba, i Joa, yu homber di Asaf, e registrado, a sali bin serka dje.

⁴E ora ei Rabsakes a bisa nan: "Awor bisa Ezekias: 'Asina e gran rei, rei di Asiria, ta bisa: "Riba kiko bo ta basa e konfiansa aki ku bo tin?

⁵Mi ta bisa: 'Bo strategia i forsa pa guera ta solamente palabranan bashi.' Awor ta den ken bo ta konfia, ku bo a rebeldia kontra mi?

⁶Mira, bo ta konfia den e bara di richi machika aki, esta, den Egipto, ku si un hende len riba dje, e ta drenta den su man i ta traspas'e. Asina Farao, rei di Egipto, ta pa tur esnan ku ta konfia den dje.

⁷Ma si bo bisami: 'Nos ta konfia den SENOR nos Dios,' no ta E ta Esun, Kende Su luganan haltu i Kende Su altarnan Ezekias a kita, i a bisa Juda i Jerusalem: 'Boso mester adora dilanti di e altar aki?'

⁸"Pesei anto, bin hasi un kombenio ku mi shon, rei di Asiria, i lo mi dunabo dos mil kabai, si abo, di bo banda, por pone koredo riba nan.

⁹Kon anto bo por resist! un solo ofisial, un di esnan di mas menos di e sirbidonan di mi shon, i konfia den Egipto pa garoshi i pa koredo di kabai?

¹⁰Akaso ta sin e aprobashon di SENOR mi a bin awor kontra e tera aki pa destruie? SENOR a bisami: 'Bai kontra e tera aki i destruie.

¹¹E ora ei Eliakim, Sebna i Joa a bisa Rabsakes: "Papia awor ku bo sirbidonan na arameo, pasobra nos ta komprende esei; i no papia ku nos na lenga hebreo, pa e pueblo ku ta riba muraya no tende."

¹²Ma Rabsakes a bisa: "Akaso ta serka bo shon i serka abo so mi shon a mandami pa papia e palabranan aki, i no serka e hombernan ku ta sinta riba muraya, kondena pa kome nan mes sushi i bebe nan mes urina huntu ku boso?"

¹³E ora ei Rabsakes a para grita na bos haltu na lenga hebreo, bisando: "Tende e palabranan di e gran rei, rei di Asiria.

¹⁴Asina rei ta bisa: 'No laga Ezekias gana boso, pasobra e lo no por libra boso;

¹⁵ni laga Ezekias hasi boso konfia den SENOR, bisando: "SENOR lo libra nos sigur; i e stat aki lo no wordu entrega den man di rei di Asiria."

¹⁶'No skucha Ezekias,' pasobra asina rei di Asiria ta bisa: 'Hasi pas ku mi i sali bin serka mi, i kada un kome di su mata di wendruif i kada un kome di su palu di figo, i kada un bebe awa di su mes rembak,

¹⁷te ora mi bin i hiba boso na un tera manera boso mes tera, un tera di mainshi i bina nobo, un tera di pan i di kunukunan di wendruif.

¹⁸'Mira pa Ezekias no gana boso, bisando: "SENOR lo libra nos." Akaso un di e diosnan di e nashonnan a yega di libra su tera for di man di rei di Asiria?

¹⁹Unda e diosnan di Hamat i Arfad ta? Unda e diosnan di Sefarvaim ta? Ki dia nan a libra Samaria for di mi man?

²⁰Ken entre tur e diosnan di e teranan aki a yega di libra nan pais for di mi man, ku SENOR lo libra Jerusalem for di mi man?'"

²¹Ma nan a keda ketu i no a kontest'e ni un palabra, pasobra e ordu di rei tabata: "No kontest'e."

²²E ora ei Eliakim, yu homber di Hilkias, kende tabata mayordomo di e kas, i Sebna, e eskriba, i Joa, yu homber di Asaf, e registrado, a sker nan pananan i a bin serka Ezekias i a kont'e e palabranan di Rabsakes.