Read Papantla Totonac Isaiah 38 Bible Online

Isaiah 38 - Papantla Totonac bible

Isaiah 38

¹Den e dianan ei Ezekias a bira malu pa muri. I profeta Isaias, yu homber di Amos, a bin serka dje i a bis'e: "Asina SENOR ta bisa: 'Regla e asuntonan di bo kas, pasobra bo ta bai muri i bo no ta keda biba.'"

²E ora ei Ezekias a bira su kara pa muraya i a hasi orashon na SENOR,

³i a bisa: "Mi ta rogaBo, O SENOR, korda awor kon mi a kana Bo dilanti den berdat i ku henter mi kurason, i a hasi bon den Bo bista." I Ezekias a yora amargamente.

⁴Anto e palabra di SENOR a yega na Isaias, bisando:

⁵"Bai bisa Ezekias: 'Asina SENOR, e Dios di bo tata David, ta bisa: "Mi a tende bo orashon, Mi a mira bo lagrimanan; mira, lo Mi anadi diesinku ana mas na bo bida.

⁶I lo Mi libra abo i e stat aki for di man di rei di Asiria, i lo Mi defende e stat aki."'

⁷"Esaki lo ta e senal di SENOR pa bo, ku SENOR lo hasi e kos aki ku El a papia:

⁸Mira, lo Mi hasi e sombra riba e trapi, ku a baha pareu ku solo riba e trapi di Akaz, bolbe bai dies tret patras." Asina e sombra di solo a bolbe bai dies tret patras riba e trapi riba kual el a baha kaba.

⁹Loke Ezekias, rei di Juda, a skirbi despues di su malesa i rekuperashon:

¹⁰Mi a bisa: "Net na mitar di mi bida mi ta bai drenta e portanan di Seol; e restu di mi ananan lo wordu kita for di mi."

¹¹Mi a bisa: "Lo mi no mira SENOR, e SENOR, den tera di e bibunan; lo mi no mira hende mas entre e habitantenan di mundu.

¹²Manera tent di un wardado di karne mi luga di biba ta wordu desarma i kita for di mi; manera un wefdo-di-tela ta lora tela, asina mi a lora mi bida. E ta kortami kita for di e aparato-pa-wef-tela; di dia i anochi Bo ta kaba ku mi.

¹³Mi a warda ku pasenshi te ora dia a habri. Manera un leon, asina E ta kibra tur mi wesunan, di dia i anochi Bo ta kaba ku mi.

¹⁴Manera souchi mi ta chip; mi ta keha manera palomba. Mi wowonan ta kansa di tantu ku mi ta wak na e halturanan; O Senor, mi ta sintimi oprimi; sea mi siguridat.

¹⁵"Kiko lo mi bisa? Pasobra El a papia ku mi i ta E mes a hasie. Lo mi kana dwal durante di tur mi ananan, pa motibu di e amargura di mi alma.

¹⁶O Senor, pa medio di e kosnan aki hende ta biba; i bida di mi spiritu ta den tur e kosnan aki; O restora mi salu i lagami biba!

¹⁷Mira, tabata pa mi mes benefisio ku mi a sufri tantu amargura; ta Abo a warda mi alma for di e pos di destrukshon, pasobra Bo a tira tur mi pikanan tras di Bo lomba.

¹⁸Pasobra Seol no por gradisiBo, morto no por alabaBo; esnan ku ta baha den pos no por spera riba Bo fieldat.

¹⁹Ta e bibunan ta duna gradisimentu na Bo, manera ami ta hasi awe; un tata ta konta su yunan di Bo fieldat.

²⁰"Siguramente SENOR lo salbami; pesei nos lo toka mi kantikanan riba instrumentnan di kuerde tur e dianan di nos bida den e kas di SENOR."

²¹Anto Isaias a bisa: "Laga nan kohe un klompi di figo pone riba e blufein, pa e rekupera."

²²E ora ei Ezekias a puntra: "Kiko ta e senal ku mi lo subi bai na e kas di SENOR?"