Read Papantla Totonac Isaiah 39 Bible Online

Isaiah 39 - Papantla Totonac bible

Isaiah 39

¹Na e tempu ei Merodak-baladan, yu homber di Baladan, rei di Babilonia, a manda kartanan i un regalo pa Ezekias, pasobra el a tende ku Ezekias tabata malu i ku el a rekupera.

²I Ezekias a keda kontentu i a mustra nan henter su kas di tesoro, e plata i e oro, e spesereinan i e zeta presioso, henter su kas di arma i tur loke tabatin den su luganan-di-warda-tesoro. No tabatin nada den su kas, ni den henter su dominio, ku Ezekias no a mustra nan.

³E ora ei profeta Isaias a bin serka rei Ezekias i a puntr'e: "Kiko e hombernan aki a bisa, i for di unda nan a bin serka bo?" I Ezekias a kontesta: "Nan a bin serka mi for di un tera leu, for di Babilonia."

⁴I e profeta a puntra: "Kiko nan a mira den bo kas?" Asina Ezekias a kontesta: "Nan a mira tur loke tin den mi kas; no tin nada den mi luganan-di-warda-tesoro ku mi no a mustra nan."

⁵E ora ei Isaias a bisa Ezekias: "Tende e palabra di e SENOR di ehersitonan:

⁶'Mira, e dianan ta bin ku tur loke tin den bo kas, i tur loke bo tatanan a akumula te dia djawe, lo wordu hiba Babilonia; nada lo no ked'atras,' SENOR ta bisa.

⁷'I di bo yu hombernan ku lo sali for di bo, ku abo lo engendra, nan lo hiba algun; i nan lo bira eunuko den e palasio di rei di Babilonia.'"

⁸E ora ei Ezekias a bisa Isaias: "E palabra di SENOR ku bo a papia ta bon." Pasobra el a pensa: "Lo tin pas i berdat durante di mi dianan."