Read Papantla Totonac Isaiah 40 Bible Online

Isaiah 40 - Papantla Totonac bible

Isaiah 40

¹"Konsola, O konsola Mi pueblo," boso Dios ta bisa.

²"Papia ku Jerusalem ku karino; i proklama na dje ku su guera a termina, ku su inikidat a wordu kita, ku el a risibi dobel for di e man di SENOR pa tur su pikanan."

³Bos di un ku ta sklama: "Prepara e kaminda pa SENOR den desierto; traha den desierto un kaminda lizu pa nos Dios.

⁴Laga tur vaye wordu eleva, i tur seru i seritu wordu baha; hasi e kamindanan malu bira sabana, i e luga yen di baranka bira un vaye hanchu.

⁵E ora ei e gloria di SENOR lo wordu revela, i tur karni lo mira esaki konhuntamente, pasobra e boka di SENOR a papia."

⁶Un bos ta bisa: "Grita." Anto el a kontesta: "Kiko mi mester grita?" Tur karni ta yerba i tur su bunitesa ta manera flor di sabana.

⁷Yerba ta seka, flor ta marchita, ora ku e rosea di SENOR supla riba dje; siguramente e pueblo ta yerba.

⁸Yerba ta seka, flor ta marchita, ma e palabra di nos Dios ta permanese pa semper.

⁹Subi riba un seru haltu, O Sion, abo ku ta trese bon notisia, lanta bo bos fuertemente, O Jerusalem, abo ku ta trese bon notisia; lanta bos, no tene miedu. Bisa e statnan di Juda: "Ata boso Dios!"

¹⁰Mira, Senor DIOS ta bin ku poder, i Su brasa lo goberna p'E. Mira, Su rekompensa ta bin huntu kuné, i Su pago ta bin Su dilanti.

¹¹Manera un wardado di karne E lo kuida Su tou, e lo kohe e lamchinan den Su brasa, i tene nan serka di Su kurason; ku ternura E lo guia esnan ku tin yu chikitu.

¹²Ta ken a midi e awanan den e hol di Su man, a marka e shelunan ku e hanchura di Su man, a kalkula e stof di tera ku un midi i a pisa e serunan den un balansa, i e seritunan ku peso?

¹³Ta ken a dirigi e Spiritu di SENOR, of a instruié komo Su konsehero?

¹⁴Ta ken El a konsulta i ta ken a dun'E komprendementu? Ta ken a sin'E den e kaminda di hustisia i a sin'E konosementu, i a instruié e kaminda di komprendementu?

¹⁵Mira, e nashonnan ta manera un gota for di un hemchi, i ta wordu konsidera manera stof riba balansa. Mira, E ta hisa e islanan manera stof fini.

¹⁶Asta Libano no ta sufisiente pa kima; ni su bestianan no ta sufisiente pa un ofrenda kima.

¹⁷Tur e nashonnan ta manera nada Su dilanti, i p'E nan ta menos ku nada i insignifikante.

¹⁸Ku ken lo bo kompara Dios? Of ki semehansa lo bo kompara kuné?

¹⁹Pa loke ta un ldolo, un homber di ofishi ta bash'e, i un plate ta fur'e ku oro i ta traha kadena di plata p'e.

²⁰Esun ku ta muchu pober pa trese un ofrenda asina ta skohe un palu ku no ta putri; e ta buska un homber di ofishi ku ta eksperto pa traha un ldolo ku no ta kenter.

²¹Boso no sa? Boso no a tende? Esaki no a wordu deklara na boso for di prinsipio? Boso no a komprende desde ku mundu a wordu funda?

²²Ta E ta sinta mas ariba di e sirkulo di tera, i e habitantenan di esaki ta manera tirakochi. Ta E ta ekstende e shelunan manera un kortina, i ta span nan manera un tent pa biba aden.

²³Ta E ta hasi gobernantenan bira nada, i ta hasi e huesnan di tera bira insignifikante.

²⁴Apenas nan a wordu planta, apenas nan a wordu sembra, apenas nan stek a saka rais den tera, ku E ta djis supla riba nan i nan ta marchita, i un bientu duru ta bai ku nan, manera yerba seku.

²⁵"Ku ken anto bo kier komparaMi, of ken ta Mi igual?" Esun Santu ta bisa.

²⁶Hisa bo wowo wak ariba i mira ta ken a krea e streanan aki; Esun ku ta guia nan ehersito segun nan kantidat, ta E ta yama nan tur na nan nomber; pa motibu di e grandesa di Su forsa i Su poder ningun di nan no ta falta.

²⁷Pakiko bo ta bisa, O Jakob, i ta keha, O Israel: "Mi kaminda ta skondi pa SENOR, i mi Dios no ta hasi kaso di mi derecho"?

²⁸Bo no sa? Bo no a tende? E Dios Eterno, e SENOR, e Kreador di e finnan di tera no ta bira kansa ni fatiga. Su komprendementu ta inskudrinabel.

²⁹E ta duna forsa na esun kansa, i E ta oumenta poder pa esun ku ta falta poder.

³⁰Hobennan mes ta bira kansa i fatiga, i hobennan ku vigor ta trompeka pisa,

³¹ma esnan ku spera riba SENOR lo hana forsa renoba; nan lo bula bai ariba ku hala manera aguila, nan lo kore sin bira fatiga, nan lo kana sin kansa.