Read Papantla Totonac Isaiah 41 Bible Online

Isaiah 41 - Papantla Totonac bible

Isaiah 41

¹"Boso, teranan na kosta, skuchaMi den silensio, i laga e pueblonan hana forsa renoba; laga nan bin dilanti i laga nan papia; laga nos bin huntu pa huisio.

²"Ta ken a lanta un hende for di oriente, ku e ta yama den hustisia na su pianan? E ta entrega nashonnan na dje i ta hasi reinan somete. Ku su spada e ta hasi nan manera stof, ku su bog e ta hasi nan manera bagas ku bientu ta supla bai kune.

³E ta persigui nan, i ta pasa trankil riba un kaminda ku su pianan no a pasa nunka.

⁴Ken a prepara i a hasi esaki, yamando generashonnan for di prinsipio? 'Ami, SENOR, ta e prome; i ku e ultimonan ta Ami t'E."'

⁵E teranan na kosta a mira i nan tin miedu; e finnan di tera ta tembla; nan a hala serka i a yega.

⁶Kada un ta yuda su bisina i ta bisa su ruman homber: "Sea fuerte!"

⁷Asina e homber di ofishi ta enkurasha e plate, i esun ku ta hasi metal plat ku martiu ta enkurasha esun ku ta bati ambelt, i ta bisa di loke el a solder: "E ta bon"; i e ta pegu'e ku klabu pa e no kenter.

⁸"Ma abo, Israel, Mi sirbido, Jakob, ku Mi a skohe, desendiente di Mi amigu Abraham,

⁹abo ku Mi a kohe for di e finnan di tera, i Mi a yama for di su luganan di mas aleha, i a bisabo: 'Abo ta Mi sirbido, Mi a skohebo i no a rechasabo.

¹⁰No tene miedu, pasobra Mi ta ku bo; no desmaya, pasobra Mi ta bo Dios. Lo Mi fortalesebo, si, lo Mi yudabo, si, lo Mi sostenebo ku Mi man drechi di hustisia.'

¹¹"Mira, tur esnan ku ta rabia ku bo lo keda brongosa i desonra; esnan ku ta pleita ku bo lo ta manera nada i lo perese.

¹²Lo bo buska esnan ku ta bringa ku bo, ma lo bo no hana nan, esnan ku ta hasi guera kontra bo lo ta manera nada, manera un kos ku nunka a eksisti.

¹³Pasobra Ami ta SENOR bo Dios, Kende ta sostene bo man drechi, Kende ta bisabo: 'No tene miedu, lo Mi yudabo.'

¹⁴No tene miedu, abo bichi Jakob, boso hombernan di Israel; lo Mi yudabo," SENOR ta deklara, "I bo Redentor ta Esun Santu di Israel.

¹⁵Mira, Mi a hasibo un herment-pa-bati-mainshi, ku ta nobo, skerpi i di dos filo; lo bo bati e serunan i hasi nan bira stof, i hasi e seritunan manera bagas.

¹⁶Lo bo bienta nan i bientu lo supla nan bai ku nan, i tempestat lo plama nan; ma abo lo regosiha den SENOR, lo bo gloria den Esun Santu di Israel.

¹⁷"E afliginan i esnan den nesesidat ta buska awa, ma no tin, i nan lenga ta seku di set; Ami, SENOR, lo kontesta nan Mi mes, komo e Dios di Israel lo Mi no bandona nan.

¹⁸Lo Mi habri riunan riba e halturanan pelon, i fuentenan meimei di e vayenan; lo Mi hasi desierto bira un tanki di awa, i tera seku fuentenan di awa.

¹⁹Lo Mi pone palu di seda, akasia, mirto i oleifi den tera seku; lo Mi pone palu di pino den desierto, huntu ku palu di bohes i di sipres,

²⁰pa nan mira, rekonose, konsidera i komprende tambe, ku e man di SENOR a hasi esaki, i Esun Santu di Israel a krea esaki.

²¹"Presenta bo kaso," SENOR ta bisa. "Trese bo defensanan fuerte padilanti," e Rei di Jakob ta bisa.

²²Laga nan yega serka i bisa nos kiko ta bai sosode; bisa kiko e kosnan ku a sosode antes tabata, pa nos konsidera nan i hana sa nan resultado; of anunsia nos kiko ta bai sosode.

²³Konta e kosnan ku ta bin despues, pa nos hana sa ku boso ta diosnan; si, hasi bon of malu, pa huntu nos wak ront di nos ku ansha i temor.

²⁴Mira, boso no bal nada i boso obra ta sin balor; esun ku skohe boso ta un abominashon.

²⁵"Mi a lanta un hende for di nort i el a bin; for di kaminda solo ta sali e lo invoka Mi nomber; e lo trapa riba gobernantenan manera riba lodo, manera e alfarero ta trapa klei."

²⁶Ken a konta esaki for di prinsipio, pa nos por sa, of for di prome aya, pa nos por bisa: "E tin rason"? Siguramente ningun hende no a konta, siguramente ningun hende no a proklama, siguramente ningun hende no a tende bo palabranan.

²⁷"Di antemano Mi a bisa Sion: 'Ata nan aki!' I Mi a bisa Jerusalem: 'Lo Mi duna un mensahero ku ta trese bon nobo.'

²⁸Ma ora Mi wak, no tin ningun hende, i entre nan no tin konsehero ku por duna kontesta, si Mi puntra nan.

²⁹Mira, nan tur ta falsu; nan obranan ta sin balor; nan imagennan basha ta bientu i banidat.