Read Papantla Totonac Isaiah 42 Bible Online

Isaiah 42 - Papantla Totonac bible

Isaiah 42

¹"Ata Mi Sirbido ku Mi ta sostene, Mi Skohi, den Kende Mi alma tin delisia. Mi a pone Mi Spiritu riba djé; E lo trese hustisia pa e nashonnan.

²E lo no grita ni halsa Su bos, ni E lo no laga Su bos wordu tendi den kaya.

³Un richi gekrak E lo no kibra, i un mecha ku ta sende flou E lo no paga; E lo trese huisio segun berdat.

⁴E lo no faya ni keda deskurasha, te ora ku El a stablese hustisia riba tera; i e teranan na kosta lo spera riba Su lei."

⁵Asina Dios e SENOR, Esun ku a krea e shelunan i a span nan, Esun ku a ekstende tera i tur loke ta krese riba dje, Esun ku ta duna rosea na e hendenan ku tin riba dje, i spiritu na esnan ku ta kana riba dje, ta bisa:

⁶"Ami ta SENOR, Mi a yamabo den hustisia, tambe lo Mi tene bo man i perkura pa bo. Lo Mi nombrabo komo un aliansa pa e pueblo, komo un lus pa e nashonnan,

⁷pa habri wowo siegu, pa libra prezonan for di den kashot, i esnan ku ta biba den skuridat, for di prizon.

⁸"Ami ta SENOR, esei ta Mi nomber; lo Mi no duna Mi gloria na un otro, ni Mi alabansa na imagennan graba.

⁹Mira, e kosnan di antes a pasa, awor Mi ta deklara kosnan nobo; prome ku nan sali na kla, Mi ta anunsia nan na boso."

¹⁰Kanta un kantika nobo na SENOR, kanta Su alabansa for di e fin di tera! Boso ku ta baha bai laman, i tur loke tin den dje, boso, islanan, i esnan ku ta biba riba nan.

¹¹Laga e desierto i su statnan halsa nan bos, e pueblitonan kaminda Kedar ta biba. Laga e habitantenan di Sela kanta duru, laga nan grita di goso for di kabes di e serunan.

¹²Laga nan duna gloria na SENOR, i deklara Su alabansa den e teranan na kosta.

¹³SENOR lo sali manera un guerero; E lo lanta Su zelo manera un homber di guera. E lo dal un gritu, si, E lo lansa un gritu di guera. E lo triunfa riba Su enemigunan.

¹⁴"Mi a keda ketu pa hopi tempu; Mi a keda ketu i a domina Mi mes. Manera un muhe na ora di parto lo Mi keha, lo Mi suspira i ansha.

¹⁵Lo Mi hasi e serunan i seritunan keda ruina, i seka henter nan plantashon; lo Mi hasi riunan bira islanan, i seka e plasnan grandi di awa.

¹⁶Lo Mi guia e siegunan riba un kaminda ku nan no konose; riba berehanan ku nan no konose lo Mi guia nan. Lo Mi hasi skuridat bira lus nan dilanti, i lo Mi hasi luganan yen di baranka bira sabana. Esakinan ta e kosnan ku lo Mi hasi, i lo Mi no keda sin kumpli ku nan."

¹⁷Ma esnan ku ta konfia den ldolonan, ku ta bisa imagennan basha: "Boso ta nos dios", lo wordu obliga di bira bai bek, i lo keda tur brongosa.

¹⁸Tende, boso, sordonan! I wak, boso, siegunan, pa boso mira.

¹⁹Ken ta siegu, sino Mi sirbido, of asina sordo manera Mi mensahero ku Mi ta manda? Ken ta siegu manera esun ku ta na pas ku Mi, of siegu manera e sirbido di SENOR?

²⁰Bo a mira hopi kos, ma bo no a paga tino; bo oreanan ta habri, ma bo no ta tende.

²¹SENOR tabata kontentu pa motibu di Su hustisia, pa hasi e lei grandi i glorioso.

²²Ma esaki ta un pueblo sakea i pluma; nan tur ta atrapa den kueba, of skondi den prizon. Nan a bira proi, sin ningun hende pa libra nan, i nan a bira botin, sin ningun hende pa bisa: "Debolbe nan!"

²³Kual di boso lo skucha esaki? Ken lo paga tino i skucha den tempu benidero?

²⁴Ken a entrega Jakob pa bira botin, i Israel den man di sakeadonan? No ta kontra SENOR nos a peka, den Kende Su kaminda nan no kier a kana, i Kende Su lei nan no a obedese?

²⁵Asina El a drama e ardor di Su rabia i e violensia di bataya riba dje; i esaki a send'e na kandela tur ront, tog e no a ripara; i esaki a kim'e, ma e no a hasi kaso.