Read Papantla Totonac Isaiah 43 Bible Online

Isaiah 43 - Papantla Totonac bible

Isaiah 43

¹Ma awor, asina SENOR, bo Kreador, ta bisa, O Jakob, i Esun ku a formabo, O Israel: "No tene miedu, pasobra Ami a redimibo; Mi a yamabo na bo nomber; bo ta di Mi!

²Ora bo ta pasa dor di e awanan lo Mi ta ku bo, i dor di e riunan, nan lo no lastrabo bai ku bo. Ora bo ta kana dor di kandela, esaki lo no flamabo, ni e flam lo no kimabo.

³Pasobra Ami ta SENOR bo Dios, Esun Santu di Israel, bo Salbador; Mi a duna Egipto komo pago pa bo, i den bo luga, Etiopia i Seba.

⁴Pasobra bo ta presioso den Mi bista, pasobra bo ta onra, i Mi ta stimabo, lo Mi duna otro hende den bo luga, i otro pueblonan en kambio di bo bida.

⁵No tene miedu, pasobra Mi ta ku bo; lo Mi trese bo yunan for di pariba, i rekohebo for di pabou.

⁶Lo Mi bisa nort: 'Entrega nan!' i suit: 'No tene nan.' Trese Mi yu hombernan for di leu, i Mi yu muhenan for di e finnan di tera,

⁷kada un ku ta wordu yama na Mi nomber, i ku Mi a krea pa Mi gloria, ku Mi a forma i ku Mi a traha."

⁸Trese e hendenan ku ta siegu, maske nan tin wowo, i esnan ku ta sordo, maske nan tin orea.

⁹Laga tur e nashonnan reuni i laga e pueblonan bin huntu. Kual di nan por konta esaki i proklama nos e kosnan di antes? Laga nan trese nan testigunan pa nan wordu hustifika, of laga nan tende i bisa: "Ta berdat."

¹⁰"Boso ta Mi testigunan," SENOR ta deklara, "I Mi sirbido ku Mi a skohe, pa boso konoseMi i kereMi i komprende ku ta Ami t'E. Prome ku Mi ningun Dios no a wordu forma, i lo no tin ningun despues di Mi.

¹¹Ami, si, Ami mes, ta SENOR, i no tin otro salbador fuera di Mi.

¹²Ta Ami a deklara, a salba i a proklama, i no tabatin ningun dios strano meimei di boso; pesei boso ta Mi testigunan," SENOR ta deklara, "I Ami ta Dios.

¹³For di eternidat ta Ami t'E, i no tin ningun hende ku por libra for di Mi man; Ami ta obra i ken por kambia esei?"

¹⁴Asina SENOR boso Redentor, Esun Santu di Israel, ta bisa: "Pa bo kousa Mi a manda un hende Babilonia, i lo Mi hasi tur e kaldeonan baha komo fugitivo bai den e barkunan, den kualnan nan tabata gloria.

¹⁵Ami ta SENOR, Esun Santu di boso, e Kreador di Israel, boso Rei."

¹⁶Asina SENOR ta bisa, Kende ta traha un kaminda dor di laman, i un bereha dor di awanan poderoso,

¹⁷Kende ta hasi garoshi i kabai sali, ehersito i homber poderoso (nan lo kai drumi huntu pa no lanta mas; nan a wordu supla, paga manera mecha):

¹⁸"No rekorda e kosnan di antes, ni keda pensa riba kosnan ku a pasa kaba.

¹⁹Mira, Mi ta bai hasi algu nobo, awor esaki ta bai sali na kla; boso no ta ripara esei? Lo Mi traha un karetera den tera seku, riunan den desierto.

²⁰E bestianan di mondi lo glorifikaMi, e chakalnan i abestrusnan; pasobra Mi a duna awa den tera seku, i riunan den desierto, pa duna di bebe na Mi pueblo skohi.

²¹E pueblo ku Mi a forma pa Mi mes lo deklara Mi alabansa.

²²"Tog bo no a sklama na Mi, O Jakob, ma bo a kansa di Mi, O Israel.

²³Bo no a trese e karnenan di bo ofrendanan kima pa Mi, ni bo no a onraMi ku bo sakrifisionan. Mi no a kargabo ku ofrendanan, ni a kansabo ku sensia.

²⁴Bo no a kumpra kana dushi ku plaka pa Mi, ni bo no a yenaMi ku e vet di bo sakrifisionan; mas bien ta abo a kargaMi ku bo pikanan, bo a kansaMi ku bo inikidatnan.

²⁵"Ami, si, Ami, ta Esun ku ta kita bo transgreshonnan pa Mi mes kousa; i lo Mi no korda bo pikanan.

²⁶HasiMi korda; laga nos diskuti nos kaso huntu; deklara bo kaso, pa bo por proba ku bo ta korekto.

²⁷Bo prome tata a peka, i bo sinadonan a transgresa kontra Mi.

²⁸Pesei lo Mi hasi e prensnan di e santuario impuru; i lo Mi entrega Jakob na maldishon, i Israel na reproche.