Read Papantla Totonac Isaiah 44 Bible Online

Isaiah 44 - Papantla Totonac bible

Isaiah 44

¹"Ma awor tende, O Jakob, Mi sirbido, i Israel, kende Mi a skohe:

²asina SENOR, Kende a trahabo, Kende a formabo den barika, i Kende lo yudabo, ta bisa: 'No tene miedu, O Mi sirbido Jakob, i abo, Jesurun, kende Mi a skohe.

³Pasobra lo Mi basha awa riba e tera ku tin set, i koridanan di awa riba e tera seku; lo Mi basha Mi Spiritu riba bo yunan, i Mi bendishon riba bo desendientenan.

⁴Nan lo spreit meimei di yerba, manera populir banda di koridanan di awa.'

⁵Esun aki lo bisa: 'Ami ta di SENOR', i esun aya lo yama su mes na e nomber di Jakob. I un otro lo skirbi riba su man: 'Ami ta di SENOR', i lo tuma e nomber Israel komo su fam.

⁶"Asina SENOR, e Rei di Israel, i su Redentor, e SENOR di ehersitonan, ta bisa: 'Ami ta e prome i Ami ta e ultimo, i no tin Dios fuera di Mi.

⁷Ken ta manera Mi? Lagu'e proklama i deklara esei; si, lagu'e pone su pruebanan Mi dilanti, for di tempu ku Mi a stablese e nashon antiguo. I laga nan deklara na nan e kosnan ku ta bin i e kosnan ku ta bai sosode.

⁸No tembla i no tene miedu. No ta for di hopi tempu pasa Mi a anunsia i a deklarabo esaki? Boso ta Mi testigunan. Tin otro Dios fuera di Mi, of tin otro Baranka? Mi no konose ningun.'"

⁹Esnan ku ta traha imagennan graba no ta nada, i nan kosnan presioso ta sin balor. Nan mes ta testigu ku eseinan no ta mira ni nan no sa nada, asina ku nan ta keda na berguensa.

¹⁰Ken a yega di traha un dios of basha un ldolo ku no ta di probecho p'e?

¹¹Mira, tur su kompaneronan lo keda na berguensa, pasobra e hombernan di ofishi, ta simplemente hende nan ta. Laga nan tur reuni, laga nan lanta para, laga nan tembla, laga nan tur huntu keda na berguensa.

¹²E smet ta kohe un herment i ta traha kune riba e karbon. E ta forma un ldolo ku martiu, i ta trah'e ku forsa di su brasa. E ta hana hamber i ta perde forsa; e no ta bebe awa i ta desmaya.

¹³E karpinte ta span su lina-di-midi; e ta marka e palu ku kreit. E ta traha riba dje ku skaf, ta mark'e ku paser i ta trah'e den forma di hende, manera e bunitesa di hende, pa e por keda den un kas.

¹⁴E ta korta palunan di seda i ta kohe un palu di sipres of un palu di eik, i ta lagu'e krese pa su mes entre e palunan di mondi-sera. E ta planta un palu di pino, i awaseru ta hasie krese.

¹⁵Anto esei ta sirbi pa hende uza komo palu pa kandela; asina e ta kohe poko for di dje i ta keinta su kurpa; tambe e ta sende un kandela pa horna pan. Tambe e ta traha un dios i ta ador'e; di dje e ta traha un imagen graba i ta tira su kurpa abou su dilanti.

¹⁶Mitar di dje e ta kima den kandela. Riba esaki e ta prepara su kuminda; e ta horna karni i ta kome su barika yen. Tambe e ta keinta su kurpa i ta bisa: "Awor si mi kurpa a keinta; mi ta sinti e kayente di e kandela."

¹⁷Ma ku loke a resta di dje e ta traha un dios--su imagen graba. E ta tira su kurpa abou su dilanti i ta ador'e. Tambe e ta hasi orashon na dje i ta bisa: "Librami, pasobra abo ta mi dios."

¹⁸Nan no sa, ni nan no ta komprende, pasobra El a tapa nan wowo, pa nan no mira, i nan kurason, pa nan no komprende.

¹⁹I ningun hende no ta sinta pensa e kos aki, ningun hende no tin konosementu ni komprendementu pa bisa: "Mi a kima mitar di dje den kandela i tambe mi a horna pan riba su karbonnan. Mi ta horna karni i ta kom'e. Anto mi ta traha un kos abominabel ku loke a resta! Mi ta tira mi kurpa abou dilanti di un bloki di palu!"

²⁰E ta biba di shinishi; un kurason enganoso a hasie desvia. E no por libra su mes ni bisa: "No ta puru mentira e kos den mi man drechi aki ta?"

²¹"Korda e kosnan aki, O Jakob, i Israel, pasobra bo ta Mi sirbido; Mi a formabo, bo ta Mi sirbido, O Israel, lo Mi no lubidabo.

²²Mi a kita bo transgreshonnan manera un nubia skur, i bo pikanan manera neblina pisa. Bolbe serka Mi, pasobra Mi a redimibo."

²³Grita di alegria, O shelunan, pasobra SENOR a hasi esaki! Regosiha, O profundidatnan di tera; boso, serunan, dal un gritu di goso, O mondi-sera i tur palu ku tin den dje; pasobra SENOR a redimi Jakob, i E ta mustra Su gloria den Israel.

²⁴Asina SENOR, bo Redentor, i Esun ku a formabo den barika, ta bisa: "Ami, SENOR, ta e trahado di tur kos, Ami mes a span e shelunan, Ami so, i a ekstende tera pa medio di Mi mes forsa.

²⁵"Mi ta hasi ku e senalnan di gabadonan ta frakasa, i ta hasi adivinadonan, bobo; Mi ta hasi hombernan sabi hal'atras, i ta hasi nan konosementu bira bobedat.

²⁶Mi ta konfirma e palabra di Su sirbido, i ta kumpli ku e proposito di Su mensaheronan. "Ta Ami ta bisa di Jerusalem: 'E lo ta habita!' i di e statnan di Juda: 'Nan lo wordu konstrui.' I lo Mi lanta su ruinanan atrobe.

²⁷Ta Ami ta bisa e profundidat di laman: 'Bira seku!' I lo Mi hasi bo riunan seka.

²⁸Ta Ami ta bisa di Siro: 'E ta Mi wardado! E lo kumpli ku tur loke Mi ta desea.' Di Jerusalem e ta deklara: 'Lo bo wordu konstrui,' i di e tempel: 'Bo fundeshi lo wordu poni.'"