Read Papantla Totonac Isaiah 47 Bible Online

Isaiah 47 - Papantla Totonac bible

Isaiah 47

¹"Baha bai i sinta den stof, O yu muhe birgen di Babilonia; sinta abou na suela, sin trono, O yu muhe di e kaldeonan. Pasobra lo bo no wordu yama suave i delikado mas.

²Kohe e piedranan di mulina i mula harina. Kita bo velo, hisa bo saya, laga bo pal'i pianan keda sunu, krusa riunan.

³Bo sunu lo wordu eksponi, i bo berguensa lo ta bisto; lo Mi tuma vengansa i no spar ni un hende."

⁴Nos Redentor, e SENOR di ehersitonan ta Su nomber, Esun Santu di Israel.

⁵"Sinta den silensio i bai den skuridat, O yu muhe di e kaldeonan, pasobra lo bo no wordu yama mas reina di reinonan.

⁶Mi tabata rabia ku Mi pueblo; Mi a profana Mi erensia, i a entrega nan den bo man. Bo no tabatin miserikordia ku nan; bo a hasi bo yugo masha pisa riba e ansianonan.

⁷Bo a bisa: 'Lo mi ta un reina pa semper.' E kosnan aki bo no a konsidera, ni a korda riba nan resultado.

⁸Awor anto, tende esaki, abo hende sensual, ku ta biba trankil asina, ku ta bisa den bo kurason: 'Ami ta, i no tin ningun otro fuera di mi. Lo mi no sinta komo biuda, ni lo mi no konose perdida di yu.'

⁹Ma e dos kosnan aki lo bin direpiente riba bo, den un solo dia: lo bo tin perdida di yu i lo bo bira biuda. Nan lo bin riba bo ku tur nan forsa, apesar di e multitut di bo bruherianan, apesar di e abundansia di bo enkantamentunan.

¹⁰Bo a konfia den bo maldat i a bisa: 'Ni un hende no ta mirami.' Bo sabiduria i bo konosementu a ganabo, pasobra bo a bisa den bo kurason: 'Ami ta, i no tin ni un fuera di mi.'

¹¹Ma maldat lo bin riba bo, i lo bo no sa for di unda e ta sali. Desaster lo kai riba bo ku bo no por evita, i destrukshon ku bo no konose lo bin direpiente riba bo.

¹²"Para firme awor den bo enkantamentunan i den e multitut di bo bruherianan, ku kualnan bo a traha for di bo hubentut; kisas bo por tin bon eksito, kisas bo por kousa teror.

¹³Bo ta kansa di e kantidat di konsehonan. Awor, laga e astrologonan, esnan ku ta profetisa pa medio di strea, esnan ku ta pronostika pa medio di luna nobo, lanta para i salbabo for di loke lo bin riba bo.

¹⁴Mira, nan a bira manera yerba seku, kandela ta kima nan; nan no por libra nan mes for di e poder di flam di kandela; lo no tin karbon pa keinta kurpa, ni kandela pa sinta dilanti di dje!

¹⁵Asina esnan ku kendenan bo a traha kansa kurpa a bira pa bo, esnan ku a anda ku bo for di bo hubentut; kada un a sigui su mes kaminda. No tin ningun pa salbabo.