Read Papantla Totonac Isaiah 48 Bible Online

Isaiah 48 - Papantla Totonac bible

Isaiah 48

¹"Tende esaki, O kas di Jakob, ku ta karga e nomber Israel, i ku ta bin for di e lomo di Juda, ku ta hura pa e nomber di SENOR, i ta invoka e Dios di Israel, ma no den berdat ni den hustisia.

²Pasobra nan ta yama nan mes siudadano di e stat santu, i ta depende di e Dios di Israel; e SENOR di ehersitonan ta Su nomber.

³Mi a konta e kosnan di antes hopi tempu pasa kaba; nan a sali for di Mi boka i Mi a proklama nan. Direpiente Mi a aktua, i nan a sosode.

⁴Pasobra Mi sa ku bo ta kabesura, i bo nek ta un bara di heru, i bo frenta ta di brons.

⁵Pesei Mi a kontabo di nan hopi tempu pasa. Prome ku nan a sosode Mi a proklama nan na bo, pa bo no bisa: 'Mi ldolo a hasi esakinan, i mi imagen graba i mi imagen basha a ordena nan.'

⁶Bo a tende i a mira tur esaki. I abo, lo bo no deklara esaki? "For di awor padilanti Mi ta proklama kosnan nobo na bo, kosnan skondi, ku bo no tabata sa.

⁷Ta awor nan a wordu krea i no hopi tempu pasa; i prome ku awe bo no a tende di nan, pa bo no bisa: 'Mira, mi tabata sa di nan.'

⁸Bo no a tende, bo no tabata sa. For di tempunan aya bo orea no tabata habri, pasobra Mi tabata sa ku lo bo a trata ku traishon; i for di bo nasementu bo a wordu yama rebelde.

⁹Pa kousa di Mi nomber Mi ta tarda ku Mi furia, i pa motibu di Mi alabansa Mi ta want'e pa bo, pa no kaba ku bo.

¹⁰Mira, Mi a refinabo, ma no manera plata; Mi a probabo den e fornu di aflikshon.

¹¹Pa motibu di Mi mes, pa motibu di Mi mes lo Mi aktua. Kon Mi por laga Mi nomber wordu profana? I Mi gloria lo Mi no duna na un otro.

¹²"SkuchaMi, O Jakob, i abo, Israel, ku Mi a yama; ta Ami t'E, Ami ta e prome, Ami ta e ultimo tambe.

¹³Siguramente Mi man a funda tera, i Mi man drechi a span e shelunan; ora Mi yama nan, nan ta para huntu.

¹⁴"Boso tur, reuni i skucha! Kual di nan a konta e kosnan aki? SENOR ta stim'e; e lo kumpli ku Su deseo kontra Babilonia, i Su brasa lo ta kontra e kaldeonan.

¹⁵Ami, si, Ami a papia; di berdat Mi a yam'e. Mi a tres'e, i su kamindanan lo prospera.

¹⁶"Hala serka Mi, tende esaki: "For di prinsipio Mi no a papia na sekreto; for di e tempu ku el a tuma luga, Ami tabata ayanan. "I awor Senor DIOS, i Su Spiritu, a mandaMi."

¹⁷Asina SENOR, bo Redentor, Esun Santu di Israel, ta bisa: "Ami ta SENOR bo Dios, Kende ta sinabo, pa bo prospera, Kende ta guiabo den e kaminda ku bo mester kana.

¹⁸Mara bo a pone atenshon na Mi mandamentunan! E ora ei bo pas lo tabata manera un riu, i bo hustisia manera ola di laman.

¹⁹Bo desendientenan lo tabata manera santu, i bo yunan na kantidat manera pipita di santu; nunka nan nomber lo no a wordu korta kita, ni destrui for di Mi presensia."

²⁰Sali for di Babilonia! Hui pa e kaldeonan! Anunsia esaki ku gritu di goso i proklam'e. Plam'e mand'e te na e finnan di tera; bisa: "SENOR a redimi Su sirbido Jakob."

²¹Nan no tabatin set tempu ku El a guia nan dor di e desiertonan. El a hasi awa basha for di e baranka pa nan; El a spleit e baranka i awa a brota sali afo.

²²"No tin pas pa e malbadonan," SENOR ta bisa.