Read Papantla Totonac Isaiah 49 Bible Online

Isaiah 49 - Papantla Totonac bible

Isaiah 49

¹SkuchaMi, O islanan, i pone atenshon, boso, pueblonan for di leu. SENOR a yamaMi for di prome ku Mi a nase; for di tempu ku Mi tabata den barika di Mi mama El a menshona Mi nomber.

²I El a hasi Mi boka manera un spada skerpi; den e sombra di Su man El a skondeMi, tambe El a hasiMi un flecha ku punta skerpi; El a skondeMi den Su muchila-pa-karga-flecha.

³I El a bisaMi: "Bo ta Mi Sirbido, Israel, den Kende Mi lo mustra Mi gloria."

⁴Ma Mi a bisa: "Mi a traha kansa Mi kurpa en bano, Mi a gasta Mi forsa pornada i en bano; ma siguramente, e huisio ku Mi merese ta den e man di SENOR, i Mi rekompensa ta serka Mi Dios."

⁵I awor SENOR, Kende a formaMi den barika pa bira Su Sirbido, ta bisa pa trese Jakob bek serka djé, pa Israel wordu reuni serka djé-- pasobra Mi ta onra den bista di SENOR, i Mi Dios ta Mi fortalesa--

⁶i E ta bisa: "No ta sufisiente ku Bo ta Mi Sirbido pa lanta e tribunan di Jakob, i pa restora esnan preserva di Israel; lo Mi hasiBo tambe un lus pa e nashonnan, pa Mi salbashon por yega te na e finnan di tera."

⁷Asina SENOR, e Redentor di Israel, i Esun Santu di dje, ta bisa Esun despresia, Esun ku e nashon ta aborese, e Sirbido di gobernantenan: "Reinan lo mira i lanta, prensnan tambe lo buig te na suela, pa motibu di SENOR, Kende ta fiel, Esun Santu di Israel, Kende a skoheBo."

⁸Asina SENOR ta bisa: "Na un tempu agradabel Mi a kontestaBo, i den e dia di salbashon Mi a yudaBo; lo Mi wardaBo i dunaBo komo aliansa pa e pueblo, pa restora e tera, pa hasi nan ereda e erensianan desola,

⁹pa bisa e prezonan: 'Sali,' i esnan ku ta den skuridat: 'Sali afo.' "Nan lo kome banda di e kamindanan; i nan luga di yerba berde lo ta riba tur haltura pelon.

¹⁰Nan lo no tin hamber ni set, ni kalor di desierto ni solo lo no hasi nan dano; pasobra Esun ku tin kompashon di nan lo guia nan, i lo guia nan na fuentenan di awa.

¹¹Lo Mi hasi tur Mi serunan bira kaminda, i Mi kamindanan grandi lo wordu eleva.

¹²Esakinan lo bin for di leu, mira, esakinan lo bin for di nort i for di pabou, i esakinan for di tera di Sinim."

¹³Grita di goso, O shelunan! I regosiha, O tera! Dal gritu di goso, O serunan! Pasobra SENOR a konsola Su pueblo, i E lo tin kompashon di Su afliginan.

¹⁴Ma Sion a bisa: "SENOR a bandonami, i Senor a lubidami."

¹⁵"Un muhe por lubida su yu ku e ta kria na pechu, i no tene kompashon ku e yu di su mondongo? Esakinan por lubida, ma Ami si lo no lubidabo.

¹⁶Mira, Mi a grababo den Mi plant'i man; bo murayanan ta kontinuamente Mi dilanti.

¹⁷Bo yu hombernan ta pura bin; esnan ku ta destruibo i ta ruinabo lo bai for di bo.

¹⁸Hisa bo kara wak ront; nan tur ta reuni, nan ta bin serka bo. Manera Mi ta biba," SENOR ta deklara, "siguramente lo bo bisti nan tur manera hoya, i mara nan na bo kurpa manera bruit ta hasi.

¹⁹"Pasobra maske bo a keda ruina i desola, i bo tera destrui-- siguramente awor lo bo ta muchu perta pa e habitantenan, i esnan ku a tragabo lo ta te leu aya.

²⁰E yunan ku bo a perde lo bisa den bo orea: 'E luga ta muchu perta pa mi; traha luga pa mi por biba aki.'

²¹E ora ei lo bo bisa den bo kurason: 'Ta ken a hana esakinan pa mi, siendo ku mi a perde mi yunan, i mi ta steril, un eksiliado i un peregrino; ta ken a kria esakinan? Mira, mi so a keda; for di unda esakinan a bin anto?'"

²²Asina Senor DIOS ta bisa: "Mira, lo Mi hisa Mi man pa e nashonnan, i lanta Mi emblema pa e pueblonan; nan lo trese bo yu hombernan den nan brasa, i bo yu muhenan nan lo karga riba nan skouder.

²³Reinan lo ta tata di kriansa pa bo, i nan prensesnan lo ta mama di lechi pa bo. Nan lo buig bo dilanti ku nan kara te na suela, i lo lembe e stof di bo pia, i lo bo sa ku Ami ta SENOR; esnan ku ta spera riba Mi lo no keda brongosa.

²⁴"Por kita proi for di e homber poderoso? Of e katibunan di un tirano por wordu reskata?"

²⁵Siguramente, asina SENOR ta bisa: "Asta e katibunan di e homber poderoso lo wordu kita for di dje, i e proi di un tirano lo wordu reskata; pasobra lo Mi pleita ku esun ku ta pleita ku bo, i lo Mi salba bo yu hombernan.

²⁶Lo Mi alimenta bo opresornan ku nan mes karni, i nan lo bira burachi di nan mes sanger, manera di bina dushi; i tur karni lo sa ku Ami, SENOR, ta bo Salbador, i bo Redentor, Esun poderoso di Jakob."