Read Papantla Totonac Isaiah 5 Bible Online

Isaiah 5 - Papantla Totonac bible

Isaiah 5

¹Awor lagami kanta pa mi stima un kantika di mi stima tokante di Su kunuku di wendruif. Mi stima tabatin un kunuku di wendruif riba un seru fertil.

²I El a kob'e tur ront, a kita e piedranan i a plant'e ku e matanan di wendruif di mas miho. Meimei di dje El a traha un toren i a traha un baki-di-pers-wendruif den dje; anto El a spera ku esaki lo a produsi bon wendruif, ma el a produsi solamente wendruif shimaron.

³"I awor, O habitantenan di Jerusalem i hombernan di Juda, huzga entre Ami i Mi kunuku di wendruif.

⁴Kiko mas tabatin di hasi pa Mi kunuku di wendruif, ku Mi no a hasi den dje? Pakiko el a produsi wendruif shimaron, mientras ku Mi tabata spera pa e produsi bon wendruif?

⁵Awor lagaMi bisa boso kiko Mi ta bai hasi ku Mi kunuku di wendruif: lo Mi kita su trankera i e lo wordu destrui; lo Mi basha su muraya abou i e lo wordu trapa.

⁶Lo Mi lagu'e keda desola; nan lo no snui e ni chapi den dje, ma kadushi i mata di sumpina lo nase den dje; i lo Mi ordena e nubianan pa no yobe riba dje."

⁷Pasobra e kunuku di wendruif di e SENOR di ehersitonan ta e kas di Israel, i e hombernan di Juda ta Su mata agradabel. El a spera huisio, ma mira, dramamentu di sanger; hustisia, ma mira, un gritu di angustia.

⁸Ai di esnan ku ta buska mas i mas kas i ku ta anadi un kunuku na otro te ora no tin luga mas, asina ku ta boso so ta biba den e tera!

⁹E SENOR di ehersitonan a hura pa mi tende: "Siguramente hopi kas lo keda desola, kasnan grandi i bunita, sin habitante.

¹⁰Pasobra dies bender di kunuku di wendruif lo produsi solamente un bato di bina, i un homer di simia lo produsi solamente un efa di mainshi."

¹¹Ai di esnan ku ta lanta mainta tempran pa kore tras di bibida sterki, ku ta keda lanta te anochi lat, te ora bina subi na nan kabes!

¹²Nan tin lirio, arpa, tamburein, fluit i bina na nan banketenan, ma nan no ta paga atenshon na e echonan di SENOR, ni nan no ta konsidera e obra di Su mannan.

¹³Pesei Mi pueblo ta bai den eksilio pa motibu di nan falta di konosementu; nan hombernan onorabel ta muri hamber, i nan multitut ta padese di set.

¹⁴Pesei Seol a habri su garganta hanchu i a span su boka habri sin midi; i den dje ta baha Jerusalem su splendor, su multitut, su boroto di fiesta i esnan ku ta regosiha den dje.

¹⁵Asina hende umilde lo wordu umiya, i hende importante lo wordu rebaha; wowo di e orguyoso tambe lo wordu rebaha.

¹⁶Ma e SENOR di ehersitonan lo wordu halsa den huisio, i e Dios santu lo mustra Su mes santu den hustisia.

¹⁷E ora ei e lamchinan lo kome manera den nan mes luga di yerba berde, i stranheronan lo kome den e luganan ruina di hende riku.

¹⁸Ai di esnan ku ta hala inikidat ku kabuyanan di engano, i pika manera ku kabuya di hala garoshi,

¹⁹kendenan ta bisa: "Lagu'E hasi lihe, lagu'E pura Su trabou, pa nos mira esei; i laga e proposito di Esun Santu di Israel hala serka, i lagu'e sosode, pa nos konose esei!"

²⁰Ai di esnan ku ta yama loke ta malu, bon, i loke ta bon, malu, loke ta skuridat, lus, i loke ta lus, skuridat, loke ta marga, dushi, i loke ta dushi, marga.

²¹Ai di esnan ku ta sabi den nan mes wowo, i prudente den nan mes bista!

²²Ai di esnan ku ta kampeon den bebementu di bina, i hombernan eksperto den mesklamentu di bibida sterki;

²³ku ta hustifika e malbado pa plaka pasa bou di mesa, i ta kita derecho di esnan ku ta hustu!

²⁴Pesei, manera lenga di kandela ta traga yerba seku, i flam ta kaba ku palu di mainshi seku, asina nan rais lo bira manera kos putri i nan flor lo bula bai manera stof; pasobra nan a rechasa e lei di e SENOR di ehersitonan, i a despresia e palabra di Esun Santu di Israel.

²⁵Pa e motibu aki e rabia di SENOR a sende kontra Su pueblo, i El a saka Su man kontra nan i a dal nan abou, i e serunan a tembla. Nan kadaver a keda tira manera sushi meimei di e kayanan. Apesar di tur esaki Su rabia no a wordu kita, ma ainda Su man ta keda ekstendi.

²⁶Tambe E lo lanta un emblema pa e nashonnan leu, i lo fluit nan for di e finnan di tera; i mira, nan lo bin lihe, masha lihe mes.

²⁷Ningun di nan no ta kansa ni ta trompeka, ningun no ta bai un madoho di sono ni ta drumi; ni e faha na nan sintura no a wordu gelos, ni e strep di nan sandalia no a wordu kibra.

²⁸Nan flechanan ta skerpi i tur nan bognan ta gespan; e hufnan di nan kabainan ta manera piedra duru, i e wilnan di nan garoshi ta manera warwaru.

²⁹Nan grunamentu ta manera di un leon muhe, i nan ta gruna manera leon chikitu. Nan ta gruna ora nan ta kohe proi, i ta kargu'e bai kune sin ningun hende pa libr'e.

³⁰Riba e dia ei nan lo gruna riba dje manera laman ta ronka. Si hende wak tera, mira, tin skuridat i angustia; i asta e lus ta wordu hasi skur dor di su nubianan.