Read Papantla Totonac Isaiah 50 Bible Online

Isaiah 50 - Papantla Totonac bible

Isaiah 50

¹Asina SENOR ta bisa: "Unda e karta di diborsio ta, ku kual Mi a repudia boso mama? Of ku kual di esnan ku Mi ta debe Mi a bende boso? Mira, ta pa boso inikidatnan boso a wordu bendi, i ta pa boso transgreshonnan boso mama a wordu repudia.

²Pakiko no tabatin ni un hende ora Mi a bin? Ora Mi a yama, pakiko no tabatin ni un hende pa kontesta? Akaso Mi man ta muchu kortiku ku e no por redimi? Of Mi no tin poder pa libra? Mira, Mi ta seka laman ku Mi reprendementu, Mi ta hasi riunan bira desierto; nan piska ta hole stinki pa falta di awa, i ta muri di set.

³Mi ta bisti e shelunan ku skuridat, i Mi ta hasi pana-di-saku nan ko'i tapa."

⁴Senor DIOS a dunaMi un lenga ku a wordu sina, pa Mi sa kon pa sostene ku palabra esun ku ta kansa. E ta spiertaMi mainta tras mainta; E ta spierta Mi orea pa tende manera un ku ta wordu sina.

⁵Senor DIOS a habri Mi orea; Mi no tabata desobedesido, ni Mi no a hal'atras.

⁶Mi a entrega Mi lomba na esnan ku ta golpiaMi, i Mi band'i kara na esnan ku ta ranka Mi barba kit'afo; Mi no a skonde Mi kara pa umiyashon i skupimentu.

⁷Pasobra Senor DIOS ta yudaMi, pesei Mi no ta wordu brongosa; pesei Mi a hasi Mi kara manera piedra duru, i Mi sa ku lo Mi no wordu brongosa.

⁸Esun ku ta hustifikaMi ta serka; ken lo pleita ku Mi? Laga nos konfronta otro. Ken tin un kaso kontra Mi? Lagu'e aserkaMi.

⁹Mira, Senor DIOS ta yudaMi; ken ta esun ku ta kondenaMi? Mira, nan tur lo gasta manera un bisti; mot lo kome nan.

¹⁰Ken entre boso ta teme SENOR, ken ta obedese e bos di Su Sirbido, ken ta kana den skuridat i no tin lus? Lagu'e konfia den e nomber di SENOR i depende riba su Dios.

¹¹Mira, boso tur ku ta pega kandela, ku ta rondona boso mes ku flambeu: kana den e lus di boso kandela i meimei di e flambeunan ku boso a sende. Esaki boso lo hana for di Mi man, i boso lo kai drumi abou den tormento.