Read Papantla Totonac Isaiah 51 Bible Online

Isaiah 51 - Papantla Totonac bible

Isaiah 51

¹"SkuchaMi, boso ku ta sigui hustisia, i ku ta buska SENOR: Mira na e baranka for di kual boso a wordu korta, i na e mina-di-piedra for di kual boso a wordu koba.

²Mira na Abraham, boso tata, i na Sara, kende a hana boso ku dolo; tempu ku e tabata un hende so, Mi a yam'e, anto Mi a bendishon'e i a multiplik'e."

³Di berdat, SENOR lo konsola Sion; E lo konsola tur su luganan desola. E lo hasi su luganan desola bira manera Eden, i su desierto manera e hofi di SENOR; goso i alegria lo wordu hana den dje, gradisimentu i e zonidu di kantamentu.

⁴"Paga atenshon na Mi, O Mi pueblo, i tendeMi, O Mi nashon; pasobra un lei lo sali for di Mi, i lo Mi pone Mi huisio komo un lus pa e pueblonan.

⁵Mi hustisia ta serka, Mi salbashon ta na kaminda, i Mi brasanan lo huzga e pueblonan; e teranan na kosta lo spera riba Mi, i riba Mi brasa nan lo pone nan speransa.

⁶Hisa boso kara wak na shelu; anto mira abou na tera, pasobra e shelunan lo disparse manera huma, i tera lo gasta manera un bisti, i su habitantenan lo muri na e mesun manera; ma Mi salbashon lo dura pa semper, i Mi hustisia lo no kaba nunka.

⁷"SkuchaMi, boso ku konose hustisia, un pueblo ku tin Mi lei den su kurason; no tene miedu di reproche di hende, ni desmaya pa kousa di nan insultonan.

⁸Pasobra mot lo kome nan manera un bisti, i bichi lo kome nan manera lana. Ma Mi hustisia lo dura pa semper, i Mi salbashon pa tur generashon."

⁹Spierta, spierta, bisti fortalesa, O brasa di SENOR; spierta manera den e tempunan aya, generashonnan di hopi tempu pasa! No ta Abo a korta Rahab na pida-pida, i a traspasa e dragon?

¹⁰No ta Abo a seka laman, e awanan di e gran profundidat, Kende a hasi e profundidatnan di laman bira kaminda, pa esnan redimi pasa ofer di dje?

¹¹Asina e rediminan di SENOR lo bolbe, i bin na Sion ku gritu di goso; i goso eterno lo ta riba nan kabes. Nan lo hana alegria i goso, i tristesa i suspiro lo hui bai.

¹²"Ami, si, Ami, ta Esun ku ta konsola boso. Ta ken bo ta ku bo tin miedu di hende mortal, i di yu di hende ku ta manera yerba,

¹³ku bo a lubida SENOR, Esun ku a trahabo, Kende a span e shelunan i a pone e fundeshinan di tera, ku henter dia, kontinuamente, bo tin miedu pa motibu di e furia di e opresor, ora ku e ta prepara pa destrui? Ma unda e furia di e opresor ta?

¹⁴Pronto e eksiliado lo wordu libra i lo no muri den kashot; tampoko e lo no falta pan.

¹⁵Pasobra Ami ta SENOR bo Dios, Kende ta hasi laman bira brabu, asina ku su olanan ta ronka-- e SENOR di ehersitonan ta Su nomber.

¹⁶Mi a pone Mi palabranan den bo boka i a tapabo ku e sombra di Mi man, pa stablese e shelunan, pa funda tera i pa bisa Sion: 'Abo ta Mi pueblo.'"

¹⁷Spierta! Spierta! Lanta, O Jerusalem, abo ku a bebe for di e man di SENOR e kopa di Su furia; te na e kachikachi bo a bebe for di e kalis ku ta hasi hende zeilu.

¹⁸Entre tur e yu hombernan ku el a hana no tin ningun pa gui'e; entre tur e yu hombernan ku el a kria no tin ningun pa tene su man.

¹⁹E dos kosnan aki a pasa ku bo; ken lo tene duele di bo? Ruina i destrukshon, hamber i spada-- kon lo Mi konsolabo?

²⁰Bo yu hombernan a desmaya, nan ta drumi abou na skina di tur kaya, manera un antilope den net; nan ta yen di e furia di SENOR, di e reprendementu di bo Dios.

²¹Pesei, pa fabor, tende esaki, abo ku ta afligi, ku ta burachi, ma no di bina:

²²asina bo Senor ta bisa, SENOR, bo Dios, Kende ta pleita e kaso di Su pueblo: "Mira, Mi a kita for di bo man e kopa ku ta hasi hende zeilu, e kalis di Mi furia; lo bo no beb'e nunka mas.

²³Lo Mi pon'e den man di esnan ku ta tormentabo, ku a bisabo: 'Drumi abou pa nos kana riba bo.' Asta bo a hasi bo lomba manera suela, i manera kaya, pa esnan ku ta kana riba dje."