Read Papantla Totonac Isaiah 52 Bible Online

Isaiah 52 - Papantla Totonac bible

Isaiah 52

¹Spierta! Spierta! Bisti bo fortalesa, O Sion; bisti bo pana bunita, O Jerusalem, stat santu. Pasobra esnan insirkumsida i impuru lo no drenta mas den bo.

²Sakudi e stof for di bo kurpa; lanta i sinta riba bo trono, O Jerusalem; libra bo mes for di e kadenanan ku tin ront di bo garganta, O yu muhe katibu di Sion.

³Pasobra, asina SENOR ta bisa, "Boso a wordu bendi pornada, i sin plaka boso lo wordu redimi."

⁴Pasobra, asina Senor DIOS ta bisa, "Den tempu pasa Mi pueblo a baha bai Egipto pa biba ayanan, anto e asirionan a oprimi nan sin motibu.

⁵"Awor anto, kiko Mi tin aki," SENOR ta deklara, "siendo ku Mi pueblo a wordu hiba sin motibu?" Atrobe SENOR ta deklara, "Esnan ku ta goberna riba nan ta hasi bofon di nan, i henter dia, kontinuamente, Mi nomber ta wordu blasfema.

⁶Pesei Mi pueblo lo konose Mi nomber; pesei den e dia ei ta Ami ta Esun ku ta bisa: 'At'Ami aki.'"

⁷Ki bunita riba e serunan ta e pianan di esun ku ta trese bon nobo, ku ta anunsia pas i ta trese bon nobo di felisidat, ku ta anunsia salbashon i ku ta bisa Sion: "Bo Dios ta reina!"

⁸Skucha! Boso guardianan ta halsa nan bos; tur huntu nan ta grita di goso, pasobra ku nan mes wowo nan lo mira ora SENOR restora Sion.

⁹Dal gritu di goso, kanta huntu, boso, luganan desola di Jerusalem; pasobra SENOR a konsola Su pueblo; el a redimi Jerusalem.

¹⁰SENOR a hasi Su brasa santu sunu den bista di tur e nashonnan, pa tur e finnan di tera por mira e salbashon di nos Dios.

¹¹Sali, sali, bai for di einan, no mishi ku nada impuru; sali for di meimei di dje, purifika boso mes, boso ku ta karga e artikulonan-di-uzo di SENOR.

¹²Ma boso lo no sali den pura, ni sali manera fugitivo; pasobra SENOR lo bai boso dilanti, i e Dios di Israel lo ta boso protekshon di patras.

¹³Mira, Mi Sirbido lo prospera; E lo ta haltu, eleva, si, grandemente eksalta.

¹⁴Meskos ku hopi a keda stom di mirabo, Mi pueblo, asina Su aparensia a keda desfigura, mas ku di kualke hende, i Su forma mas ku di e yunan di hende.

¹⁵Asina E lo sprengu hopi nashon; reinan lo sera nan boka pa Su motibu, pasobra loke no a wordu konta na nan, nan lo mira, i loke nan no a tende, nan lo komprende.