Read Papantla Totonac Isaiah 54 Bible Online

Isaiah 54 - Papantla Totonac bible

Isaiah 54

¹"Grita di goso, si, grita na bos haltu, O muhe steril, abo ku nunka a hana yu; dal gritu di goso, grita na bos haltu, abo ku nunka a konose dolo di parto; pasobra e yu hombernan di e muhe desola lo ta mas hopi ku e yu hombernan di esun kasa," SENOR ta bisa.

²"Hasi e luga di bo tent mas grandi; span e kortinanan di bo luganan di biba, sin spar nada; hasi bo kabuyanan mas largu, i hasi bo stakanan mas fuerte.

³Pasobra lo bo ekspande na man drechi i na man robes. I bo desendientenan lo podera di nashonnan, i nan lo habita e statnan desola.

⁴"No tene miedu, pasobra lo bo no wordu brongosa; ni sintibo umiya, pasobra bo kara lo no keda na berguensa, ma lo bo lubida e berguensa di bo hubentut, i lo bo no korda mas e reproche ku bo ta biuda.

⁵Pasobra Esun ku a trahabo ta bo esposo, Kende Su nomber ta e SENOR di ehersitonan; i bo Redentor ta Esun Santu di Israel, Kende ta wordu yama e Dios di henter tera.

⁶Pasobra SENOR a yamabo, manera un esposa bandona i tristu den spiritu, i manera un esposa di un hende su hubentut, ora ku e wordu rechasa," bo Dios ta bisa.

⁷"Pa un momento kortiku Mi a bandonabo, ma ku gran kompashon lo Mi rekohebo.

⁸Den e furia di Mi rabia Mi a skonde Mi kara pa bo pa un momento; ma ku miserikordia eterno lo Mi tin kompashon ku bo," SENOR, bo Redentor, ta bisa.

⁹"Pasobra pa Mi esaki ta manera e dianan di Noe; meskos ku Mi a hura ku e awanan di Noe lo no tapa tera nunka mas, asina Mi a hura ku lo Mi no rabia ku bo, ni reprendebo.

¹⁰Pasobra e serunan por wordu kita i e seritunan por sakudi, ma Mi miserikordia lo no wordu kita for di bo, i Mi aliansa di pas lo no wordu sakudi," e SENOR, Kende tin kompashon ku bo, ta bisa.

¹¹"O hende afligi, ku ta abati pa tempestat, i sin konsuelo, mira, lo Mi pega bo piedranan den antimonio, i bo fundeshinan lo Mi pega den piedra di safiro.

¹²Ademas, lo Mi traha bo torennan di rubi, i bo portanan di stat di kristal, i henter bo muraya di piedra presioso.

¹³SENOR lo sina tur bo yu hombernan, i e prosperidat di bo yu hombernan lo ta grandi.

¹⁴Lo bo wordu stablesi den hustisia; lo bo ta leu di opreshon, pasobra lo bo no tin miedu; i leu di teror, pasobra esei lo no yega serka bo.

¹⁵Si un hende bin atakabo violentamente, esei lo no bin for di Mi. Esun ku atakabo lo kai pa bo kousa.

¹⁶"Mira, ta Ami mes a krea e smet ku ta supla e kandela di karbon, i ku ta traha un arma pa esaki hasi su trabou; i Mi a krea e destruido pa destrui.

¹⁷Ningun arma ku wordu forma kontra bo lo no prospera; i tur lenga ku lanta kontra bo den huzgamentu lo bo kondena. Esaki ta e erensia di e sirbidonan di SENOR, i nan hustifikashon ta bin for di Mi," SENOR ta deklara.