Read Papantla Totonac Isaiah 55 Bible Online

Isaiah 55 - Papantla Totonac bible

Isaiah 55

¹"Bin, tur esnan ku tin set, bin na e awanan; i boso ku no tin plaka, bin kumpra i kome. Bin kumpra bina i lechi sin plaka i sin preis.

²Pakiko boso ta gasta plaka na loke no ta pan, i ta gasta boso sueldo na loke no ta satisfase? SkuchaMi bon i kome loke ta bon, i laga boso alma gosa den abundansia.

³Inklina boso orea i bin serka Mi. Skucha, pa boso por biba; i lo Mi sera un aliansa eterno ku boso, segun e miserikordianan fiel mustra na David.

⁴Mira, Mi a hasie un testigu pa e pueblonan, un lider i komandante pa e pueblonan.

⁵Mira, lo bo yama un nashon ku bo no konose, i un nashon ku no konosebo lo kore bin serka bo, pa motibu di SENOR bo Dios, Esun Santu di Israel; pasobra El a glorifikabo."

⁶Buska SENOR, mientras ku E por wordu hana; yam'E, mientras ku E ta serka.

⁷Laga e malbado bandona su kaminda, i e hende inhustu su pensamentunan; i lagu'e bolbe serka SENOR, i E lo tin kompashon kune; i serka nos Dios, pasobra E lo pordona abundantemente.

⁸"Pasobra Mi pensamentunan no ta boso pensamentunan, ni boso kamindanan no ta Mi kamindanan," SENOR ta deklara.

⁹Pasobra meskos ku e shelunan ta mas haltu ku tera, asina Mi kamindanan ta mas haltu ku boso kamindanan, i Mi pensamentunan mas haltu ku boso pensamentunan.

¹⁰Pasobra manera awaseru i sneu ta kai for di shelu, i no ta bolbe ayanan sin muha tera, i ta hasi tera produsi i spreit, i ta duna simia na e sembrado i pan na esun ku ta kome,

¹¹asina Mi palabra ku ta sali for di Mi boka lo ta; e lo no bolbe bashi serka Mi, sin kumpli ku loke Mi ta desea, i sin alkansa e proposito ku kual Mi a mand'e.

¹²"Boso lo sali ku goso i lo wordu guia den pas; e serunan i seritunan lo dal gritu di goso boso dilanti, i tur palu di kunuku lo bati man.

¹³Na luga di mata di sumpina lo nase palu di sipres; i na luga di bringamosa lo nase mirto; i esaki lo ta un rekuerdo na SENOR, pa un senal eterno ku lo no wordu korta kita afo."