Read Papantla Totonac Isaiah 57 Bible Online

Isaiah 57 - Papantla Totonac bible

Isaiah 57

¹Hende hustu ta perese, i ningun hende no ta preokupa pa esei; hende deboto ta wordu hiba, i ningun hende no ta komprende ku e hende hustu ta wordu hiba pa spar e di maldat ku ta bin.

²Esnan ku a kana e kaminda rekto ta drenta un pas; nan ta sosega riba nan kama.

³"Bin aki, boso, yunan di un hasido di bruha, yunan di un adultero i un prostituta.

⁴Ku ken boso ta chansa? Pa ken boso ta habri boka grandi i ta saka lenga? Boso no ta yunan di transgreshon, un generashon mentiroso,

⁵ku ta kima di pashon bou di e palunan di eik, bou di tur palu berde, ku ta mata mucha den e vayenan, den holnan di baranka?

⁶Bo porshon ta entre e piedranan lizu di e vaye, eseinan ta bo parti; na nan bo a basha un ofrenda di bibida, bo a ofrese ofrenda di mainshi. Mi mester keda ketu tokante di e kosnan aki?

⁷Bo a habri bo kama riba un seru haltu i eleva. Tambe bo a subi bai ayanan pa ofrese sakrifisio.

⁸I tras di e porta i e kosein-di-porta bo a lanta bo simbolo pagano; di berdat, despues ku bo a bandonaMi, bo a ekspone bo mes; bo a subi i a habri bo kama hanchu. Bo a bin na un akuerdo ku nan, bo a gusta nan kama, bo a wak nan sunu.

⁹Bo a biaha bai serka rei ku zeta i a oumenta bo perfumenan; bo a manda bo mensaheronan hopi leu i bo a baha te den Seol.

¹⁰E kaminda largu a kansabo, tog bo no a bisa: 'No tin speransa.' Bo a hana forsa renoba, pesei bo no a desmaya.

¹¹"Pa ken bo tabata preokupa i spanta ora bo a gana i no a korda riba Mi, ni a pensa riba Mi? Ta pasobra Mi a keda ketu pa hopi tempu, pesei bo no tin miedu di Mi?

¹²Lo Mi deklara bo hustisia i bo echonan, ma nan lo no ta di benefisio pa bo.

¹³Ora bo sklama, laga bo kolekshon di ldolonan librabo. Ma bientu lo bai ku nan tur i un rosea lo kita nan. Ma esun ku tuma refugio den Mi lo ereda e tera, i lo posee Mi seru santu."

¹⁴I lo wordu bisa: "Drecha, drecha, prepara e kaminda; kita tur opstakulo for di e kaminda di Mi pueblo."

¹⁵Pasobra, asina Esun haltu i sublime, Kende ta biba pa semper, Kende Su nomber ta Santu, ta bisa: "Mi ta biba den un luga haltu i santu, i tambe huntu ku esnan umilde i di spiritu kibra, pa rebiba spiritu di e hende kibra i pa rebiba kurason di e umilde.

¹⁶Pasobra lo Mi no diskuti pa semper, ni lo Mi no ta rabia pa semper, pasobra spiritu di hende lo desmaya Mi dilanti, i rosea di esnan ku Mi a traha.

¹⁷Pa motibu di e inikidat di su ganashi inhustu Mi a rabia i Mi a dal e; Mi a skonde Mi kara i a keda rabia, tog el a sigui desvia segun e deseonan di su kurason.

¹⁸Mi a mira su kondukta, ma lo Mi kur'e; lo Mi gui'e i bolbe duna konsuelo, tantu na dje komo na su yoradonan.

¹⁹Mi ta krea e fruta di lepnan. Pas, pas pa esun ku ta leu i pa esun ku ta serka, i lo Mi kur'e," SENOR ta bisa.

²⁰Ma e malbadonan ta manera laman brutu ku no por keda trankil, i su awanan ta tira sushedat i lodo den laira.

²¹"No tin pas pa e malbadonan," mi Dios ta bisa.