Read Papantla Totonac Isaiah 58 Bible Online

Isaiah 58 - Papantla Totonac bible

Isaiah 58

¹"Grita duru, no tene aden; halsa bo bos manera trompet, i mustra Mi pueblo nan transgreshon, i e kas di Jakob nan pikanan.

²Tog nan ta buskaMi dia tras dia, i ta nan delisia pa konose Mi kamindanan, manera un nashon ku a hasi hustisia, i no a bandona e ordenansa di nan Dios. Nan ta pidiMi desishonnan hustu; pa hala serka Dios ta nan delisia.

³'Pakiko nos a yuna i Bo no ta mira? Pakiko nos a umiya nos mes i Bo no ta ripara?' "Mira, riba e dia ku boso ta yuna, boso ta hasi loke boso kier, i ta eksplota tur boso trahadonan.

⁴Mira, boso yunamentu ta kaba na pleitamentu i na bringamentu, i na dalmentu ku moketa di maldat. Boso no ta yuna awe pa hasi ku boso bos ta wordu tendi te den haltu aya.

⁵Akaso ta un yunamentu asin'aki Mi ta skohe: un dia pa hende umiya su mes, pa e laga su kabes kologa manera richi, i pa habri pana-di-saku i shinishi komo kama? Bo ta yama esaki yunamentu, un dia agradabel na SENOR?

⁶"No ta esaki ta e yunamentu ku Mi ta skohe: pa kita e kadenanan di maldat, pa los e kabuyanan di e yugo, i pa duna libertat na esnan oprimi i kibra tur yugo?

⁷No ta pa parti bo pan ku esun ku tin hamber, i pa trese e pobernan, ku no tin kas, den bo kas; pa ora bo mira un hende sunu, bo bistie, i pa no bira lomba pa bo mes famia?

⁸E ora ei bo lus lo sali manera e ourora, i bo rekuperashon lo sigui mesora; i bo hustisia lo bai bo dilanti; e gloria di SENOR lo ta bo protekshon di patras.

⁹E ora ei lo bo yama, i SENOR lo kontesta; lo bo sklama, i E lo bisa: 'At'Ami aki.' "Si bo kita e yugo for di meimei di boso, si bo stop di mustra dede i di lanta kalumnia,

¹⁰i si bo pone bo mes disponibel pa yuda esnan ku tin hamber, i satisfase e deseo di esnan afligi, e ora ei bo lus lo sali den skuridat, i bo tiniebla lo bira manera merdia.

¹¹I SENOR lo guiabo kontinuamente, i lo satisfase bo deseo den luganan kima dor di solo, i duna forsa na bo wesunan; lo bo ta manera un hofi bon muha, i manera un fuente di awa ku su awanan no ta kaba.

¹²I bo mes hendenan lo traha e ruinanan antiguo di nobo; lo bo lanta e fundeshinan antiguo, i lo bo wordu yama Esun ku ta Drecha e Kibra den Muraya, Esun ku ta Drecha e Kayanan unda Hende por Biba.

¹³"Si riba dia di sabat bo warda bo pia di hasi bo mes gana riba Mi dia santu, i si bo yama dia di sabat un delisia, e dia santu di SENOR onorabel, i si bo onra esaki dor di bandona bo mes kamindanan, dor di no buska bo mes plaser, i di no papia bo mes palabra,

¹⁴e ora ei lo bo tin delisia den SENOR, i lo Mi hasibo kore riba e halturanan di tera; lo Mi alimentabo ku e erensia di bo tata Jakob, pasobra e boka di SENOR a papia."