Read Papantla Totonac Isaiah 59 Bible Online

Isaiah 59 - Papantla Totonac bible

Isaiah 59

¹Mira, e man di SENOR no ta kortiku ku e no por salba; tampoko Su orea no ta sordo ku e no por tende.

²Ma boso inikidatnan a kousa separashon entre boso i boso Dios; i boso pikanan a hasi ku Su kara a keda skondi pa boso, asina ku E no ta tende.

³Pasobra boso mannan ta mancha ku sanger, i boso dedenan ku inikidat; boso lepnan a papia mentira; boso lenga ta papia maldat.

⁴Ni un hende no ta eksigi hustisia, i ni un hende no ta pleita su kaso ku integridat. Nan ta konfia den konfushon i ta papia mentira; nan ta konsebi maldat i ta produsi inikidat.

⁵Nan ta brui webu di kolebra i ta wef kas di arana; esun ku kome nan webu ta muri; i for di loke a keda machika, un kolebra ta sali.

⁶Nan kas di arana no ta sirbi komo bisti, tampoko nan no por tapa nan mes ku nan obranan; nan obranan ta obranan di inikidat, i un echo di violensia ta den nan man.

⁷Nan pia ta kore pa hasi maldat, i nan ta pura pa drama sanger inosente; nan pensamentunan ta pensamentunan di inikidat; ruina i destrukshon ta den nan kamindanan grandi.

⁸Nan no konose e kaminda di pas, i no tin hustisia den nan lastronan; nan a hasi nan berehanan tur trosi; esun ku kana riba nan no konose pas.

⁹Pesei huisio ta leu for di nos, i hustisia no ta alkansa nos. Nos ta spera lus, ma ata skuridat; nos ta spera klaridat, ma nos ta kana den tiniebla.

¹⁰Nos ta fula kantu di muraya manera hende siegu, nos ta fula manera esnan ku no tin wowo; merdia nos ta trompeka meskos ku den skuritu; entre esnan ku ta yen di vigor nos ta manera hende morto.

¹¹Nos tur ta gruna manera ber, i ta keha tristu asina manera palomba; nos ta spera hustisia, ma no tin, i salbashon, ma esaki ta leu for di nos.

¹²Pasobra nos transgreshonnan ta multiplika Bo dilanti, i nos pikanan ta testifika kontra nos; pasobra nos transgreshonnan ta ku nos, i nos konose nos inikidatnan:

¹³nos ta transgresa i ta nenga SENOR, i ta bira for di nos Dios; nos ta papia di opreshon i rebeldia, i ta pensa i papia palabranan di mentira ku ta origina den nos kurason.

¹⁴Huisio ta wordu rechasa i hustisia ta keda para leu, pasobra berdat a trompeka den kaya, i integridat no por drenta.

¹⁵Si, berdat ta hasi falta, i esun ku bandona maldat ta hasi su mes bira proi. Awor SENOR a mira esaki, i tabata desagradabel den Su bista ku no tabatin hustisia.

¹⁶El a mira ku no tabatin ningun hende, i a keda asombra ku no tabatin ningun hende pa intersede; anto Su mes brasa a trese salbashon p'E, i Su hustisia a sosten'E.

¹⁷El a bisti hustisia manera ta bisti korasa, i e helm di salbashon riba Su kabes; El a bisti bistinan di vengansa komo pana, i a lora Su mes den zelo, manera den un mantel.

¹⁸Segun nan echonan, asina E lo paga bek-- furia pa Su atversarionan i pago pa Su enemigunan; na e teranan na kosta E lo duna e pago meresi.

¹⁹Pesei nan lo teme e nomber di SENOR for di pabou, i Su gloria for di kaminda solo ta sali. Ora ku e enemigu bin manera un diluvio, e Spiritu di SENOR lo lanta un emblema kontra dje.

²⁰"Un Redentor lo bin Sion, serka esnan di Jakob ku bandona nan transgreshon," SENOR ta deklara.

²¹"I pa loke ta Ami, esaki ta Mi aliansa ku nan," SENOR ta bisa. "Mi Spiritu ku ta riba bo, i Mi palabranan ku Mi a pone den bo boka, lo no aparta for di bo boka ni for di boka di bo yunan, ni for di boka di yunan di bo yunan, di awor i pa semper," SENOR ta bisa.