Read Papantla Totonac Isaiah 6 Bible Online

Isaiah 6 - Papantla Totonac bible

Isaiah 6

¹Den e ana ku rei Uzias a muri mi a mira Senor sinta riba un trono, haltu i eleva, i e kola di Su mantel tabata yena e tempel.

²Serafinnan tabata para ariba di djé. Kada un tabatin seis hala; ku dos e tabata tapa su kara, ku dos e tabata tapa su pianan i ku dos e tabata bula.

³I un tabata yama bisa otro: "Santu, Santu, Santu, ta e SENOR di ehersitonan, henter tera ta yen di Su gloria."

⁴I e fundeshinan di e drempelnan a tembla na zonidu di e bos di esun ku tabata yama, mientras ku e tempel tabata yena ku huma.

⁵E ora ei mi a bisa: "Ai di mi, pasobra mi ta ruina! Pasobra mi ta un homber di lep impuru, i mi ta biba meimei di un pueblo di lep impuru; pasobra mi wowo a mira e Rei, e SENOR di ehersitonan."

⁶E ora ei un di e serafinnan a bula bin serka mi, ku un karbon sendi den su man ku el a kohe ku pins for di e altar.

⁷I kune el a mishi ku mi boka i a bisa: "Mira, esaki a mishi ku bo lepnan; i bo inikidat ta kita, i bo pika ta pordona."

⁸Despues mi a tende e bos di Senor ta puntra: "Ken lo Mi manda i ken lo bai pa Nos?" E ora ei mi a kontesta: "At'ami aki! Manda ami!"

⁹I El a bisa: "Bai, i bisa e pueblo aki: 'Sigui skucha, ma no komprende; sigui mira, ma no ripara.'

¹⁰Hasi kurason di e pueblo aki insensitivo, hasi nan orea sordo i nan wowo skur, pa nan no mira ku nan wowo, tende ku nan orea, komprende ku nan kurason, i repenti i wordu kura."

¹¹E ora ei mi a bisa: "Pa kuantu tempu mas, Senor?" i El a kontesta: "Te ora statnan keda ruina i sin habitante, kasnan keda sin hende, i e tera keda kompletamente desola;

¹²i te ora SENOR manda hende na luganan leu, i e luganan bandona bira hopi den e tera.

¹³Tog lo keda un desimo parti den dje, i esaki lo wordu kima atrobe, manera un palu di roble of un palu di eik, di kual e tronkon ta keda despues ku el a wordu gekap. E simia santu ta su tronkon."