Read Papantla Totonac Isaiah 60 Bible Online

Isaiah 60 - Papantla Totonac bible

Isaiah 60

¹"Lanta, briya, pasobra bo lus a yega, i e gloria di SENOR ta briya riba bo.

²Pasobra mira, skuridat lo tapa tera, i skuridat profundo e pueblonan; ma SENOR lo briya riba bo, i Su gloria lo parese riba bo.

³Nashonnan lo bin na bo lus, i reinan na e klaridat di bo manise.

⁴"Hisa kara i wak tur ront di bo; nan tur ta bin huntu, nan ta bin serka bo. Bo yu hombernan lo bin for di leu, i bo yu muhenan lo wordu karga na hep.

⁵E ora ei lo bo mira i keda radiante, i bo kurason lo ta yen-yen di goso, pasobra e abundansia di laman lo wordu entrega na bo, e rikesa di e nashonnan lo bin serka bo.

⁶Un multitut di kamel lo yena bo tera, kamel yon for di Madian i Efa; tur esnan for di Saba lo bin; nan lo trese oro i sensia, i lo trese bon nobo di e alabansanan di SENOR.

⁷Tur e tounan di karne di Kedar lo wordu tresi huntu pa bo, e karnenan chubatu di Nebaiot lo sirbibo; nan lo wordu asepta komo ofrenda riba Mi altar, i lo Mi glorifika Mi kas glorioso.

⁸"Ta ken esakinan ta ku ta bula manera nubia, i manera palomba na nan bentananan di trali?

⁹Siguramente e teranan na kosta lo speraMi; i e barkunan di Tarsis lo bin prome, pa trese bo yu hombernan for di leu, ku nan plata i nan oro, pa e nomber di SENOR bo Dios, i pa Esun Santu di Israel, pasobra El a glorifikabo.

¹⁰"Stranheronan lo lanta bo murayanan di nobo, i nan reinan lo sirbibo; pasobra den Mi furia Mi a dal bo, i den Mi miserikordia Mi a hana duele di bo.

¹¹Bo portanan lo ta habri tur ora; nan lo no wordu sera ni di dia ni anochi, pa hende por trese e rikesa di e nashonnan pa bo, huntu ku nan reinan den proseshon.

¹²Pasobra e nashon i e reino ku no kier sirbibo lo perese, i e nashonnan lo keda ruina kompletamente.

¹³"E gloria di Libano lo bin serka bo, e palunan di pino, bohes i sipres, tur huntu, pa hasi e luga di Mi santuario bunita; i lo Mi hasi e luga di Mi pianan glorioso.

¹⁴E yu hombernan di esnan ku a afligibo lo bin buig bo dilanti, i tur esnan ku a despresiabo lo buig te na bo plant'i pia. Nan lo yamabo e stat di SENOR, e Sion di Esun Santu di Israel.

¹⁵"Maske bo a keda bandona i odia, sin ku ningun hende ta pasa dor di bo, lo Mi hasibo un orguyo eterno, un goso di generashon pa generashon.

¹⁶Tambe lo bo chupa lechi di nashonnan, i lo chupa pechu di reinan; e ora ei lo bo sa ku Ami, SENOR, ta bo Salbador i bo Redentor, Esun Poderoso di Jakob.

¹⁷Na luga di brons lo Mi trese oro, i na luga di heru lo Mi trese plata, na luga di palu, brons, i na luga di piedra, heru. Lo Mi hasi pas bira bo atministradonan, i hustisia bira bo mayordomonan.

¹⁸Violensia lo no wordu tend! mas den bo tera, ni ruina ni destrukshon paden di bo fronteranan; ma lo bo yama bo murayanan 'salbashon', i bo portanan 'alabansa'.

¹⁹Solo lo no ta bo lus mas den dia, ni klaridat di luna lo no briya riba bo; pasobra SENOR lo ta bo lus eterno, i bo Dios lo ta bo gloria.

²⁰Bo solo lo no baha mas, ni bo luna lo no mengua; pasobra lo bo tin SENOR pa un lus eterno, i e dianan di bo lamentashon lo termina.

²¹Anto henter bo pueblo lo ta hustu; nan lo posee e tera pa semper, e rama ku Mi a planta, e obra di Mi mannan, pa Mi wordu glorifika.

²²Esun di mas chikitu lo bira un tribu, i esun di mas menos lo bira un nashon poderoso. Na su debido tempu, Ami, SENOR, lo pura hasi esaki."