Read Papantla Totonac Isaiah 61 Bible Online

Isaiah 61 - Papantla Totonac bible

Isaiah 61

¹E Spiritu di Senor DIOS ta riba mi, pasobra SENOR a ungimi pa hiba bon nobo na esnan afligi; El a mandami pa kura hende di kurason kibra, pa proklama libertat na katibunan, i libertat na prezonan,

²pa proklama e ana agradabel di SENOR, i e dia di vengansa di nos Dios; pa konsola tur esnan ku ta yora,

³pa duna esnan ku ta yora na Sion un korona di bunitesa na luga di shinishi, zeta di alegria na luga di yoramentu, un mantel di alabansa na luga di un spiritu di desesperashon. Asina nan lo wordu yama "eiknan di hustisia", e plantashon di SENOR, pa E wordu glorifika.

⁴E ora ei nan lo lanta e ruinanan antiguo di nobo. Nan lo restora e luganan destrui pa hopi tempu kaba; nan lo drecha e statnan ruina, ku a keda desola pa generashonnan largu.

⁵Hendenan deskonosi lo para kla pa pastoria boso tounan di karne, i stranheronan lo ta boso kunukeronan i kuidadonan di boso kunukunan di wendruif

⁶Ma boso lo wordu yama e saserdotenan di SENOR; boso lo wordu yama sirbidonan di nos Dios. Boso lo kome e rikesa di nashonnan, i boso lo gloria den nan rikesanan.

⁷Na luga di boso berguensa boso lo tin un porshon dobel, i na luga di umiyashon nan lo grita di goso pa motibu di nan porshon. Pesei nan lo posee un porshon dobel den nan tera; goso eterno lo ta di nan.

⁸Pasobra Ami, SENOR, ta stima hustisia, Mi ta odia ladronisia den ofrenda kima; i fielmente lo Mi duna nan nan rekompensa, i lo Mi sera un aliansa eterno ku nan.

⁹Anto nan yunan lo ta konosi entre e nashonnan, i nan desendientenan meimei di e pueblonan. Tur ku mira nan lo rekonose nan, pasobra nan ta e yunan ku SENOR a bendishona.

¹⁰Lo mi gosa grandemente den SENOR; mi alma lo regosiha den mi Dios, pasobra El a bistimi ku e bistinan di salbashon. El a lorami den e mantel di hustisia, manera un bruidehom ta dorna su kabes ku un korona, i manera un bruit ta dorna su mes ku su prendanan.

¹¹Pasobra manera tera ta hasi mata nase, i manera un hofi ta hasi e kosnan sembra den dje spreit, asina Senor DIOS lo hasi hustisia i alabansa spreit dilanti di tur e nashonnan.