Read Papantla Totonac Isaiah 62 Bible Online

Isaiah 62 - Papantla Totonac bible

Isaiah 62

¹Pa motibu di Sion lo mi no keda ketu, i pa motibu di Jerusalem lo mi no sosega, te ora ku su hustisia sali manera splendor, i su salbashon manera flambeu send!.

²I e nashonnan lo mira bo hustisia, i tur rei bo gloria. Lo bo hana un nomber nobo ku boka di SENOR lo duna.

³Tambe lo bo ta un korona di bunitesa den e man di SENOR, i un diadema real den e man di bo Dios.

⁴Nan lo no bisabo mas: "Bandona," ni nan lo no bisa bo tera mas: "Desola"; ma lo bo wordu yama: "Mi delisia ta den dje," i nan lo yama bo tera: "Kasa"; pasobra SENOR tin delisia den bo, i bo tera lo ta kasa kuné.

⁵Pasobra manera un yonkuman ta kasa ku un birgen, asina bo yu hombernan lo kasa ku bo; i manera bruidehom tin goso den su bruit, asina bo Dios lo tin goso den bo.

⁶Mi a pone guardianan riba bo murayanan, O Jerusalem; henter dia i henter anochi nan lo no keda ketu ni un ora so. Boso ku ta korda SENOR, no buska sosiegu pa boso mes;

⁷i no dun'E sosiegu te ora ku E stablese i hasi Jerusalem bira un alabansa riba tera.

⁸SENOR a hura pa medio di Su man drechi i pa medio di Su brasa fuerte: "Nunka mas lo Mi no duna bo mainshi komo kuminda pa bo enemigunan, ni stranheronan lo no bebe bo bina nobo, pa kual bo a traha mata kurpa."

⁹Ma esnan ku ta kosech'e lo kom'e, i alaba SENOR; i esnan ku ta rekoh'e lo beb'e den e plenchinan di Mi santuario.

¹⁰Pasa, pasa dor di e portanan di stat; prepara e kaminda pa e pueblo; drecha, drecha e kaminda grandi; kita e piedranan, lanta un emblema pa e pueblonan.

¹¹Mira, SENOR a proklama te na fin di tera: Bisa e yu muhe di Sion: "Ata bo salbashon ta bin; mira, Su rekompensa ta huntu kuné, i Su pago ta Su dilanti."

¹²I nan lo yama nan "E pueblo santu, e rediminan di SENOR"; i lo bo wordu yama "Un stat buska i no bandona."