Read Papantla Totonac Isaiah 63 Bible Online

Isaiah 63 - Papantla Totonac bible

Isaiah 63

¹Ken esaki ta ku ta bin for di Edom, for di Bosra, ku bisti kora, Esun aki ku ta mahestuoso den Su bisti, ku ta marcha den e grandesa di Su fortalesa? "Ta Ami ku ta papia den hustisia, ku ta poderoso pa salba."

²Pakiko Bo pana ta kora, i Bo bistinan manera di esun ku ta trapa den e baki-di-pers-wendruif?

³"Ta Ami so a trapa den e baki-di-pers-wendruif, i no tabatin ningun hende di e pueblonan huntu ku Mi. Tambe Mi a trapa nan den Mi rabia i a plecha nan den Mi furia; nan sanger a spat riba Mi bistinan, i Mi a mancha tur Mi pana.

⁴Pasobra e dia di vengansa tabata den Mi kurason, i Mi ana di redenshon a yega.

⁵Mi a wak i no tabatin ni un hende pa yuda, i Mi a keda asombra ku ni un hende no tabata duna sosten; asina Mi mes brasa a trese salbashon pa Mi, i Mi furia a sosteneMi.

⁶Mi a kana riba e pueblonan den Mi rabia, i a hasi nan burachi den Mi furia, i Mi a basha nan sanger riba tera."

⁷Lo Mi menshona e miserikordianan di SENOR, e alabansanan di SENOR, konforme tur loke SENOR a duna nos, i e gran bondat pa ku e kas di Israel, ku El a duna nan konforme Su kompashon, i konforme e multitut di Su miserikordianan.

⁸Pasobra El a bisa: "Siguramente, nan ta Mi pueblo, yunan ku no ta gana." Asina El a bira nan Salbador.

⁹Den tur nan aflikshon E tabata afligi, i e Angel di Su presensia a salba nan. Den Su amor i den Su miserikordia El a redimi nan; El a hisa nan i a karga nan tur e dianan di prome aya.

¹⁰Ma nan a rebeldia i a hasi Su Spiritu Santu tristu; pesei, pa nan El a kambia bira nan enemigu; El a bringa ku nan.

¹¹Anto Su pueblo a korda riba e dianan di prome aya, riba Moises. Unda Esun ta ku a trese nan for di laman huntu ku e wardadonan di Su tou? Unda Esun ta ku a pone Su Spiritu Santu meimei di nan,

¹²ku a hasi Su brasa glorioso bai na man drechi di Moises, ku a parti e awanan nan dilanti pa stablese un nomber eterno pa Su mes,

¹³ku a guia nan dor di e profundidatnan? Manera kabai den tera seku, nan no a trompeka;

¹⁴manera baka ku ta baha bai den vaye, e Spiritu di SENOR a duna nan sosiegu. Asina Bo a guia Bo pueblo, pa stablese un nomber glorioso pa Bo mes.

¹⁵Wak abou for di shelu i mira for di Bo habitashon santu i glorioso; unda Bo zelo i Bo echonan poderoso ta keda? Bo ta nenga di mustrami e karino di Bo kurason i Bo kompashon.

¹⁶Pasobra Abo ta nos Tata, maske Abraham no konose nos, i Israel no rekonose nos. Abo, O SENOR, ta nos Tata, nos Redentor for di eternidat ta Bo nomber.

¹⁷O SENOR, pakiko Bo ta hasi nos dwal for di Bo kamindanan, i ta hasi nos kurason duru pa nos no tin temor pa Bo? Bolbe pa motibu di Bo sirbidonan, e tribunan di Bo erensia.

¹⁸Bo pueblo santu tabata posee Bo santuario pa un tempu kortiku; nos atversarionan a trapa riba dje.

¹⁹Nos a bira manera esnan ku Bo no a goberna nunka, manera esnan ku no a wordu yama na Bo nomber.