Read Papantla Totonac Isaiah 65 Bible Online

Isaiah 65 - Papantla Totonac bible

Isaiah 65

¹"Mi a revela Mi mes na esnan ku no a puntra pa Mi; Mi a wordu hana dor di esnan ku no a buskaMi. Mi a bisa: 'At'Ami aki, at'Ami aki,' na un nashon ku no a invoka Mi nomber.

²Henter dia Mi a habri Mi mannan pa un pueblo rebelde, ku ta kana den un kaminda ku no ta bon, i ta sigui nan mes pensamentunan,

³un pueblo ku ketu bai ta probokaMi den Mi kara; ku ta ofrese sakrifisionan den hofinan, i ta kima sensia riba klenku;

⁴ku ta sinta meimei di grafnan, i ta pasa nochi den luganan sekreto; ku ta kome karni di porko, i ku tin buyon di karni impuru den nan weanan;

⁵ku ta bisa: 'Keda bo so, no aserkami, pasobra mi ta mas santu ku bo!' Esakinan ta huma den Mi nanishi, un kandela ku ta kima henter dia.

⁶"Mira, esaki ta para skirbi Mi dilanti, lo Mi no keda ketu, ma lo Mi paga nan bek; lo Mi paga nan bek den nan skochi,

⁷tantu nan mes inikidatnan komo e inikidatnan di nan tatanan tur huntu," SENOR ta bisa. "Pasobra nan a kima sensia riba e serunan, i a blasfemaMi riba e seritunan, pesei lo Mi midi e sueldo kompleto di nan trabou di antes den nan skochi."

⁸Asina SENOR ta bisa: "Manera bina nobo ta wordu hana den troshi di wendruif, i hende ta bisa: 'No destruie, pasobra tin benefisio den dje', asina lo Mi hasi pa kara di Mi sirbidonan; lo Mi no destrui nan tur.

⁹Lo Mi hasi desendientenan sali for di Jakob, i un eredero di Mi serunan for di Juda; Mi skohinan lo ered'e i Mi sirbidonan lo biba ayanan.

¹⁰Saron lo ta un luga di yerba berde pa tounan di karne, i e vaye di Akor lo ta un luga pa baka sosega, pa Mi pueblo ku ta buskaMi.

¹¹"Ma boso ku ta bandona SENOR, ku ta lubida Mi seru santu, ku ta pone mesa pa Fortuna, i ku ta yena kopa ku bina meskla pa Destino:

¹²lo Mi destina boso pa spada, i boso tur lo hinka rudia pa wordu mata. Pasobra Mi a yama, ma boso no a kontesta; Mi a papia, ma boso no a tende. Boso a hasi loke ta malu den Mi bista, i a skohe loke Mi no tabatin delisia den dje."

¹³Pesei, asina Senor DIOS ta bisa: "Mira, Mi sirbidonan lo kome, ma boso lo pasa hamber. Mira, Mi sirbidonan lo bebe, ma boso lo tin set. Mira, Mi sirbidonan lo regosiha, ma boso lo wordu brongosa.

¹⁴Mira, Mi sirbidonan lo dal gritu di goso ku un kurason kontentu, ma boso lo grita yora ku un kurason pisa, i boso lo lamenta ku un spiritu kibra.

¹⁵Boso lo laga boso nomber komo un maldishon pa Mi skohinan, i Senor DIOS lo mata boso; ma Mi sirbidonan lo Mi duna un otro nomber.

¹⁶Pasobra esun ku ta bendishona den e tera lo wordu bendishona pa e Dios di berdat; i esun ku hura den e tera lo hura pa e Dios di berdat; pasobra e problemanan di antes a wordu lubida, i pasobra nan ta skondi pa Mi bista!

¹⁷"Pasobra mira, Mi ta krea shelunan nobo i un tera nobo; i e kosnan di antes lo no wordu rekorda mas ni bin na memoria.

¹⁸Ma sea kontentu i regosiha pa semper den loke Mi ta krea; pasobra mira, Mi ta krea Jerusalem pa goso, i su pueblo pa alegria.

¹⁹Tambe lo Mi regosiha ofer di Jerusalem i lo tin delisia den Mi pueblo; i e bos di lamento i e zonidu di yoramentu lo no wordu tendi mas den dje.

²⁰"Nunka mas lo tin den dje yu chikitu ku ta biba poko dia so, ni ansiano ku no ta biba tur su dianan; pasobra e hoben lo muri na edat di shen ana, i esun ku no yega edat di shen lo wordu konsidera komo maldishona.

²¹I nan lo traha kas i biba den nan; tambe nan lo planta kunukunan di wendruif i kome nan fruta.

²²Nan lo no traha kas pa otro hende biba aden, ni planta pa otro hende kome; pasobra manera e dianan di un palu, asina e dianan di Mi pueblo lo ta; i Mi skohinan lo disfruta di e obra di nan mannan pa hopi tempu.

²³Nan lo no traha en bano, ni hana yu pa kalamidat; pasobra nan ta yu di esnan ku SENOR a bendishona, i huntu ku nan, nan desendientenan.

²⁴Tambe lo sosode ku prome ku nan yama, lo Mi kontesta, i mientras nan ta papia ainda, lo Mi tende.

²⁵Lobo i lamchi di karne lo kome yerba huntu; leon lo kome yerba seku manera buey; i stof di tera lo ta kolebra su kuminda. Nan lo no hasi malu ni dano den henter Mi seru santu," SENOR ta bisa.