Read Papantla Totonac Isaiah 66 Bible Online

Isaiah 66 - Papantla Totonac bible

Isaiah 66

¹Asina SENOR ta bisa: "Shelu ta Mi trono, i tera ta e banki pa Mi pia. Unda e kas ta anto ku abo por traha pa Mi? I unda tin un luga pa Mi sosega?

²Pasobra ta Mi man a traha tur e kosnan aki, i asina tur e kosnan aki a bin na eksistensia," SENOR ta deklara. "Ma di esun aki lo Mi hasi kaso: di esun ku ta umilde i ku tin spiritu kibra, i ku ta tembla pa Mi palabra.

³Ma esun ku mata un buey ta manera un ku ta mata un hende; esun ku sakrifika un lamchi ta manera un ku ta kibra garganta di kacho; esun ku ofrese ofrenda di mainshi ta manera un ku ta ofrese sanger di porko; esun ku kima sensia ta manera un ku ta bendishona idolo. Meskos ku nan a skohe nan mes kamindanan, i nan alma tin delisia den nan abominashonnan,

⁴asina lo Mi skohe nan kastigu, i lo Mi trese riba nan loke nan tin miedu di dje. Pasobra Mi a yama, ma ni un hende no a kontesta; Mi a papia, ma nan no a skucha. Nan a hasi maldat den Mi bista, i a skohe loke Mi no tabatin delisia den dje."

⁵Tende e palabra di SENOR, boso ku ta tembla pa Su palabra: "Boso ruman hombernan ku ta odia boso, ku ta eksklui boso pa motibu di Mi nomber, a bisa: 'Laga SENOR ta glorifika, pa nos mira boso goso.' Ma nan lo wordu brongosa.

⁶Un bos di boroto for di e stat! Un bos for di e tempel! E bos di SENOR, Kende ta duna Su enemigunan e pago meresi!

⁷"Prome ku el a hana dolo di parto, el a duna lus; prome ku su dolo a kuminsa, el a duna lus na un yu homber.

⁸Ken a yega di tende un kos asina? Ken a yega di mira kosnan asina? Un tera por nase den un dia? Un nashon por wordu hana den un momento? Asina ku Sion a hana dolo di parto, el a hana su yunan tambe.

⁹Akaso Mi ta laga e momento di parto yega sin ku Mi ta laga e yu nase?" SENOR ta bisa. "Of Ami, Kende ta laga e yu nase, ta sera matris?" bo Dios ta bisa.

¹⁰"Sea alegre huntu ku Jerusalem i regosiha pa su motibu, boso tur ku ta stim'e; regosiha grandemente huntu kune, boso tur ku ta yor'e,

¹¹pa boso bebe i keda satisfecho na su pechunan di konsuelo, pa boso bebe i tin delisia den e abundansia di su pechu."

¹²Pasobra, asina SENOR ta bisa: "Mira, Mi ta dun'e pas manera un riu, i e gloria di e nashonnan manera un korida di awa ku ta basha ofer; boso lo bebe pechu, boso lo wordu karga na hep, i karisia riba skochi.

¹³Manera esun ku su mama ta konsola, asina lo Mi konsola boso; i boso lo keda konsola na Jerusalem.

¹⁴"E ora ei boso lo mira esaki, i boso kurason lo ta kontentu, i boso wesunan lo florese manera yerba nobo; i e man di SENOR lo wordu hasi konosi na Su sirbidonan, ma E lo keda indigna pa ku Su enemigunan.

¹⁵Pasobra mira, SENOR lo bin ku kandela, i Su garoshinan ta manera un warwaru, pa drama Su rabia ku furia, i Su reprendementu ku flam di kandela.

¹⁶Pasobra ku kandela i ku Su spada SENOR lo ehekuta huisio riba tur karni, i esnan ku SENOR mata lo ta hopi.

¹⁷"Esnan ku ta santifika i ta purifika nan mes pa bai den e hofinan, siguiendo tras di esun meimei, kendenan ta kome karn'i porko, kos repugnante i raton, nan tur huntu lo yega na un fin," SENOR ta deklara.

¹⁸"Pasobra Mi konose nan obranan i nan pensamentunan; e tempu ta bin pa reuni tur nashon i lenga. I nan lo bin i mira Mi gloria.

¹⁹"I lo Mi pone un senal meimei di nan i lo manda sobrebibientenan for di nan na e nashonnan--na Tarsis, Put, Lut, Meshek, Tubal i Javan--na e teranan na kosta te leu aya, ku no a tende di Mi fama ni a mira Mi gloria. I nan lo deklara Mi gloria meimei di e nashonnan.

²⁰Anto nan lo trese tur boso rumannan for di tur e nashonnan komo un ofrenda di mainshi na SENOR--riba kabai, den garoshi, den wagen, riba mula i riba kamel--na Mi seru santu Jerusalem, meskos ku e yunan di Israel ta trese nan ofrenda di mainshi den un artikulo-di-uzo limpi na e kas di SENOR," SENOR ta bisa.

²¹"Tambe lo Mi tuma algun di nan komo saserdote i komo levita," SENOR ta bisa.

²²"Pasobra meskos ku e shelunan nobo i e tera nobo, ku lo Mi traha, lo permanese Mi dilanti," SENOR ta deklara, "asina boso desendientenan i boso nomber lo permanese.

²³I lo ta di luna nobo pa luna nobo, i di sabat pa sabat, ku henter humanidat lo bin pa buig Mi dilanti," SENOR ta bisa.

²⁴"Anto nan lo sali mira e kadavernan di e hombernan ku a transgresa kontra Mi; pasobra nan bichi lo no muri, i nan kandela lo no wordu paga, i nan lo ta un abominashon pa henter humanidat."