Read Papantla Totonac Isaiah 8 Bible Online

Isaiah 8 - Papantla Totonac bible

Isaiah 8

¹E ora ei SENOR a bisami: "Kohe un tabla grandi pa bo mes i skirbi riba dje ku leter ku tur hende por lesa: Maher-salal-hasbaz.

²I lo Mi tuma pa Mi mes testigunan fiel pa testimonio, saserdote Urias i Zakarias, yu homber di Jeberekias."

³E ora ei mi a bai serka e profeta muhe, i el a konsebi i a duna lus na un yu homber. Anto SENOR a bisami: "Yam'e Maher-salal-hasbaz,

⁴pasobra prome ku e mucha por bisa 'Mi tata' of 'Mi mama,' e rikesa di Damasko i e botin di Samaria lo wordu hiba dilanti di rei di Asiria."

⁵Atrobe SENOR a papia ku mi, bisando:

⁶"Komo ku e hendenan aki a nenga e awanan di Siloe ku ta kore suave asina, i ta gosa den Rezin i den e yu homber di Remalias,

⁷pesei awor, mira, Senor ta bai trese riba nan e awanan poderoso i abundante di Riu Eufrates, esta, rei di Asiria i tur su gloria; i esei lo subi pasa ofer di tur su kanalnan i pasa ofer di tur su oriyanan.

⁸Anto e lo penetra drenta Juda; e lo pasa ofer i sigui bai; e lo yega te na garganta, i su halanan habri lo yena e hanchura di bo tera, O Emanuel.

⁹"Sea kibra, O pueblonan, i sea destrosa; i skucha, tur luga di mundu ku ta keda leu. Faha boso mes i sea destrosa; faha boso mes i sea destrosa.

¹⁰Traha un plan, ma e lo wordu stroba; papia un palabra, ma esaki lo no tuma luga, pasobra Dios ta ku nos."

¹¹Pasobra asina SENOR a papia ku mi ku gran poder i a instruimi pa no kana den e kaminda di e pueblo aki, bisando:

¹²"No bisa: 'Esaki ta un komplot', tokante di tur loke e pueblo aki ta yama komplot; i no teme loke nan ta teme, ni tene miedu di dje.

¹³Ta e SENOR di ehersitonan boso mester konsidera komo santu; E ta Esun ku boso mester teme, i E ta Esun di Kende boso mester tin miedu.

¹⁴E ora ei E lo bira un santuario; ma pa tur dos e kasnan di Israel E lo bira un piedra pa trompeka riba dje i un baranka ku ta hasi nan kai, i un laso i un trampa pa e habitantenan di Jerusalem.

¹⁵Hopi di nan lo trompeka riba nan; nan lo kai i wordu kibra; nan lo wordu kohl den trampa i wordu kaptura."

¹⁶Mara e testimonio, seya e lei entre mi disipelnan.

¹⁷I lo mi spera riba SENOR, Kende ta skonde Su kara pa e kas di Jakob; i lo mi busk'E.

¹⁸Mira, ami i e yunan ku SENOR a dunami ta pa senalnan i maraviyanan den Israel di parti di e SENOR di ehersitonan, Kende ta biba riba Seru Sion.

¹⁹I ora nan bisabo: "Konsulta ku e montadonan i e spiritistanan, kendenan ta papia ketu-ketu i ta murmura"--no ta ku su Dios un pueblo mester konsulta? E mester konsulta ku e mortonan pa e bibunan?

²⁰Bai na e lei i na e testimonio! Si nan no ta papia konforme e palabra aki, ta pasobra nan no tin lus den nan.

²¹I nan lo pasa dor di e tera ku angustia i hamber. I lo sosode ku ora nan tin hamber, nan lo ta furioso; i mirando ariba, nan lo maldishona nan rei i nan Dios.

²²Anto nan lo mira na tera, i ata, ansha i skuridat, e tiniebla di angustia; i nan lo wordu pusha den skuridat.