Read Papantla Totonac Isaiah 9 Bible Online

Isaiah 9 - Papantla Totonac bible

Isaiah 9

¹Ma lo no tin tiniebla mas pa esun ku tabata den angustia. Den tempunan pasa El a trata tera di Zabulon i tera di Neftali ku despresio, ma despues E lo hasie glorioso, na e kaminda di laman, na e otro banda di Jordan, Galilea di e paganonan.

²E pueblo ku ta kana den skuridat lo mira un gran lus; esnan ku ta biba den un tera skur, un lus lo lusa riba nan.

³Lo Bo multiplika e nashon, lo Bo oumenta nan goso; nan lo ta kontentu den Bo presensia, manera hende sa ta kontentu den tempu di kosecha, manera hombernan sa regosiha ora nan ta parti botin.

⁴Pasobra Abo lo kibra e yugo ku ta pisa riba nan i e bara riba nan skouder, e garoti di nan opresor, manera na e bataya di Madian.

⁵Pasobra kada lars di guerero ku ta wordu uza den bataya, i kada mantel lora den sanger lo ta destina pa wordu kima, lo ta kombustibel pa kandela.

⁶Pasobra un yu a nase pa nos, un yu homber ta duna na nos, i e gobernashon lo ta riba Su skouder. Su nomber lo ta Konsehero Maraviyoso, Dios Poderoso, Tata Eterno, Prens di Pas.

⁷Lo no tin fin na e oumento di Su gobernashon i di pas, riba e trono di David i riba su reino, pa stablese esaki i manten'e ku huisio i hustisia for di e tempu ei i pa semper. E zelo di e SENOR di ehersitonan lo hasi esaki.

⁸Senor ta manda un mensahe kontra Jakob i esaki ta kai riba Israel.

⁹I henter e pueblo sa esaki, esta, Efrain i e habitantenan di Samaria, ku ta bisa ku orguyo i ku arogansia di kurason:

¹⁰"E klenkunan a kai abou, ma nos lo trah'e di nobo ku piedra gekap; e palunan di sikamor a wordu basha abou, ma nos lo remplasa nan ku palu di seda."

¹¹Pesei SENOR ta lanta atversarionan for di Rezin kontra nan, i ta instiga nan enemigunan,

¹²e sirionan for di pariba i e filisteonan for di pabou; i nan ta traga Israel ku boka hanchu habri. Apesar di tur esaki Su rabia no ta wordu kita, i Su man ta keda ekstendi.

¹³Tog e pueblo no ta bolbe serka Esun ku a suta nan, ni nan no ta buska e SENOR di ehersitonan.

¹⁴Asina SENOR ta korta kabes i rabu di Israel kit'afo, tantu rama di palma komo richi den un solo dia.

¹⁵E kabes ta e homber ansiano i onorabel, i e profeta ku ta duna sinansa falsu ta e rabu.

¹⁶Pasobra esnan ku ta guia e pueblo aki ta hasi nan desvia; i esnan ku a wordu guia dor di nan ta keda konfundi.

¹⁷Pesei Senor no ta hiba gustu den nan hobennan; tampoko E no tin duele di nan werfanonan ni di nan biudanan, pasobra kada un di nan ta impio i hasido di maldat, i tur boka ta papia lokura. Apesar di tur esaki Su rabia no ta wordu kita, i Su man ta keda ekstendi.

¹⁸Pasobra maldat ta kima manera kandela; e ta kaba ku kadushi i mata di sumpina; asta e partinan sera di mondi e ta pega na kandela, i nan ta subi bai ariba den un kolumna di huma.

¹⁹Dor di e furia di e SENOR di ehersitonan e tera a wordu kima, i e pueblo ta manera kombustibel pa e kandela; ningun hende no ta spar su ruman.

²⁰Nan ta morde loke ta na man drechi, ma ainda tin hamber, i nan ta kome loke ta na man robes, ma nan no ta keda satisfecho; kada un di nan ta kome e karni di su mes brasa.

²¹Manases ta devora Efrain, i Efrain Manases, i huntu nan ta kontra Juda. Apesar di tur esaki Su rabia no ta wordu kita, i Su man ta keda ekstendi.