Read Papantla Totonac Levitiko 1 Bible Online

Levitiko 1 - Papantla Totonac bible

Levitiko 1

¹E ora ei SENOR a yama Moises i a papia kune for di e tent di reunion, bisando:

²"Papia ku e yunan di Israel i bisa nan: 'Ora ku un di boso hiba un ofrenda pa SENOR, boso mester hiba boso ofrenda di bestia for di e kria di baka of for di e kria di bestia chikitu.

³'Si su ofrenda ta un ofrenda kima for di e kria di baka, e mester ofrese un bestia machu sin defekto; e mester ofrese esaki na entrada di e tent di reunion, pa e wordu asepta dilanti di SENOR.

⁴I e mester pone su man riba kabes di e ofrenda kima, pa esaki wordu asepta p'e, pa hasi ekspiashon p'e.

⁵I e mester mata e bishe machu dilanti di SENOR, i Aaron su yu hombernan, e saserdotenan, mester ofrese e sanger i sprengu e sanger tur ront riba e altar ku tin na entrada di e tent di reunion.

⁶E ora ei e mester soya e ofrenda kima i kort'e na su diferente pidanan.

⁷I e yu hombernan di saserdote Aaron mester pone kandela riba e altar i prepara palu riba e kandela.

⁸E ora ei Aaron su yu hombernan, e saserdotenan, mester prepara e diferente pidanan, e kabes i e sebu, riba e palu ku tin riba e kandela ku ta riba e altar.

⁹Ma su shirishiri i su patanan e mester laba ku awa. I e saserdote mester kima tur riba e altar komo un ofrenda kima, un ofrenda di kandela di un holo dushi na SENOR.

¹⁰'Ma si su ofrenda ta for di e kria di bestia chikitu, di karne of di kabritu, komo un ofrenda kima, e mester ofrese un bestia machu sin defekto.

¹¹I e mester mat'e banda di e altar parti panort dilanti di SENOR, i Aaron su yu hombernan, e saserdotenan, mester sprengu su sanger tur ront riba e altar.

¹²E ora ei e mester kort'e na su diferente pidanan, huntu ku su kabes i su sebu, i e saserdote mester prepara nan riba e palu ku tin riba e kandela ku ta riba e altar.

¹³Ma e shirishiri i e patanan e mester laba ku awa. I e saserdote mester ofrese tur i kima esaki riba e altar; esaki ta un ofrenda kima, un ofrenda di kandela di un holo dushi na SENOR.

¹⁴'Ma si su ofrenda na SENOR ta un ofrenda kima di parha, e ora ei e mester trese su ofrenda di tortelduif of di pichon.

¹⁵I e saserdote mester hib'e na e altar i trose su kabes kit'afo, i kim'e riba e altar; i su sanger mester wordu basha afo kontra e banda di e altar.

¹⁶Tambe e mester kita su buchi ku su plumanan, i tira esaki banda di e altar, parti pariba, na e luga pa shinishi.

¹⁷E ora ei e mester ten'e na su halanan sker e, sin kit'e kompletamente for di otro. I e saserdote mester kim'e riba e altar riba e palu ku tin riba e kandela; ta un ofrenda kima, un ofrenda di kandela di holo dushi na SENOR.